எழுத்தாளர் இயற்கை அவர்களின் படைப்பில் வெளியான ‘தொண்டாங் கவுறு’ கவிதைத் தொகுதி, மண்ணின் வாசனையையும் மனித வாழ்க்கையின் யதார்த்தத்தையும் வட்டார வழக்கு மொழியில் மிக அழகாகப் பதிவு செய்யும் ஒரு அரிய கவிதைத் தொகுப்பு.
செயற்கையான புனைவுகள் ஏதுமின்றி, கிராமத்து மக்களின் அன்றாடப் பேச்சு வழக்கில் இழையோடும் உணர்ச்சிகளையும், இயல்பான வாழ்வியலையும் கவிதைகளாக வடித்துள்ள பாங்கு இத்தொகுப்பின் தனிச்சிறப்பு.
இத்தொகுப்பில் உள்ள கவிதைகள் எளிய மக்களின் மனித உறவுகள், காதல், வலி, மற்றும் வாழ்வாதாரப் போராட்டங்களை நேரடியாகவும் நயம்படவும் வெளிப்படுத்துகின்றன.
‘ஒளி விலகல்’ போன்ற கவிதைகளில் சிறார்களுக்கேயான குறும்புத்தனமும், எளிய விளையாட்டுகளுக்குள் ஒளிந்திருக்கும் ஏக்கமும் வெளிப்படும் அதே வேளையில்,
‘தூவானம்’ மற்றும் ‘பழைய ஈரம்’ போன்ற கவிதைகளில் கிராமத்து வீடுகளின் சூழலும், மழையோடு பிணைந்த மனித மனங்களின் உணர்வுகளும் மிக நுட்பமாகச் சித்தரிக்கப்பட்டுள்ளன.
அதேபோல, ‘இதுமாதிரிப் பேசனதில்ல’ மற்றும் ‘ஊங்கோட்டாத நாட்கள்’ போன்ற படைப்புகள் மனிதர்களுக்கிடையேயான பிணக்குகள், ஊடல், மனக்கசப்புகள் மற்றும் அன்பின் பரிமாணங்களை வட்டார மொழியின் தன்மை மாறாமல் எடுத்துரைக்கின்றன.
தலைப்புக் கவிதையான ‘தொண்டாங் கவுறு’ விவசாய நிலங்கள், காவல் நிலங்கள், வளர்ச்சி என்ற பெயரில் எளிய மக்களின் வாழ்விடங்களுக்கும் வாழ்வாதாரங்களுக்கும் ஏற்படும் அச்சுறுத்தல்கள் மற்றும் அவர்களின் வேதனையை மிக ஆழமாகப் பதிவு செய்கிறது.
‘தொண்டாங் கவுறு’ கவிதைத் தொகுதி வாசகனைத் தன் சொந்தக் கிராமத்துத் தெருக்களுக்கும் எளிய மனிதர்களின் நினைவுகளுக்கும் அழைத்துச் செல்லும் ஒரு உணர்வுப்பூர்வமான அனுபவமாகத் திகழ்கிறது.
வட்டார வழக்குக் கவிதைகளின் வழியே கிராமத்து வாழ்வியலின் ஆன்மாவை உயிர்ப்புடன் நிலைநிறுத்தியுள்ள எழுத்தாளர் இயற்கை அவர்களின் இமுயற்சி தமிழ் கவிதை உலகிற்கு ஒரு நல்வரவாகும்.
இக்கவிதைத் தொகுப்பில் இடம் பெற்றுள்ள 50 கவிதைகளின் விவரம் :
* சிங்கார் சாந்து
* சற்றுத் தூக்கலாய் எரியும் ராந்தல்
* மானமுள்ள மழை
* அகலிகை
* இன்னொரு அம்மாக்கள்
* ரங்க ராட்னம்
* அவுத்துப் பாத்தா
* லேசாகக் கசிவது
* ஒரு கொடம் தண்ணி ஊத்தி
* கராரான வியாபாரம்
* வதல பாக்கு வாங்கனும் ரண்ருபா குடு
* அப்பா கதைகள்
* பொண்ணுன்னா நான் தான தாய்த் தெய்வத் தாண்டவம்
* தொண்டாங் கவுறு
* நடவு
* இதுமாதிரிப் பேசனதில்ல
* நிலாக் கும்பல்
* ஊங்கொட்டாத நாட்கள்
* வாடிப் போடி பழக்கம்
* நாயகி
* ன்னாமே சோறு போடவா
* பால் பல்
* சர்க்கரை மீனா
* ஊன்றுக் கோல்
* அப்பந் தான்
* ஒளி விலகல்
* பழய ஈரம்
* ஐஸ்பாய் விளையாடும்போது தொலஞ்சிப் போன அன்பரசி
* தூவானம்
* ஒருத் தாய்ப் பிள்ளைகள்
* காமாட்சி பெரியம்மா எம்.பி.பி.எஸ்
* நல்லாயிருந்தப் பூக்கள்
* பேஞ்சிக் கெடுக்குது
* கதை மாந்தர்கள்
* நேர்க் கணக்கு
* கப்பல் காரர் ஏழுமலை
* கதவு அம்மா
* சாமிக் கண்ணு
* தம்பிக்காரன்
* மெகா பிக்சல்
* சொர்க்க வாசல்
* வெற்றிலை
* சண்டக் கத்
* தெய்வ சாப்பாடு
* தூள் வெயில்
* கல்லாகும் சாபம்
* எது ஏர்வ
* கைமாத்து
* பொம்மைகள்
* தாந் தச ஆடும்
என தலைப்பு ஒவ்வொன்றிலும் மண்வாசம், கவிஞருக்கு மனமார்ந்த பாராட்டுகள்.
சமூகவியல் ஆசிரியர், விவசாயி, புகைப்படக் கலைஞர், எழுத்தாளர் மற்றும் இலக்கிய இதழாசிரியர் எனப் பன்முகத் திறமை கொண்ட கவிஞர் இயற்கை அவர்களின் ஆளுமையே இக்கவிதைத் தொகுப்பின் ஒவ்வொரு வரிகளிலும் பிரதிபலிக்கிறது.
ஒரு சமூகவியல் ஆசிரியராக மனித உறவுகளையும் சமுதாய மாற்றங்களையும் கூர்ந்து கவனிக்கும் அவரது பார்வை, இக்கவிதைகளில் உள்ள எளிய மனிதர்களின் கதைகளாகவும் போராட்டங்களாகவும் பரிணமித்துள்ளது.
நிலத்தோடு இணைந்த விவசாயியாக அவர் பெற்ற அனுபவங்கள், மண் வாசனை மாறாத சொற்களாகவும், பயிர்களையும் மழையையும் நேசிக்கும் இயற்கை சார்ந்த கவிதைகளாகவும் மிளிர்கின்றன.
அவரது புகைப்படக் கலைஞருக்கான கூர்மையான பார்வை, கவிதைகளில் காட்சிகளைத் தத்ரூபமாக வாசகர்களின் கண்முன்னே நிறுத்துகிறது.
ஒரு எழுத்தாளராகவும் இலக்கிய இதழாசிரியராகவும் மொழி மீதும் வட்டார வழக்கின் மீதும் அவர் கொண்டுள்ள ஆழமான புலமை, இத் தொகுப்பிற்குப் பெருமை சேர்க்கிறது.
இவ்வாறு தம் பல்வகை வாழ்வியல் அனுபவங்களை ஒன்றிணைத்து, தமிழ் இலக்கிய உலகிற்கு 'தொண்டாங் கவுறு' என்னும் உன்னதமான படைப்பை அளித்த கவிஞர் இயற்கை அவர்களுக்கு மனமார்ந்த வாழ்த்துகளும் பாராட்டுகளும்!
