தி பிக் ஷார்ட் The Big Short திரைப்படம் 2015 வெளியானது.
இப்படத்தை ஆடம் மெக்கே இயக்கியுள்ளார். இது வாழ்க்கை வரலாற்று நகைச்சுவை நாடகத் திரைப்படம்.
2008 ஆம் ஆண்டில் அமெரிக்க வீட்டுவசதி சந்தை வீழ்ச்சியால் ஏற்பட்ட உலகளாவிய நிதி நெருக்கடியை ஒரு சில முதலீட்டாளர்கள் எவ்வாறு முன்கூட்டியே கணித்து அதன் மூலம் லாபம் ஈட்டினார்கள் என்பதை இத்திரைப்படம் சுருக்கமாக விவரிக்கிறது.
இத்திரைப்படத்தின் அடிநாதம் பேராசை, ஊழல் மற்றும் பொறுப்பற்ற தன்மையால் கட்டமைக்கப்பட்ட ஒரு மாபெரும் பொருளாதார அமைப்பின் வீழ்ச்சியைத் தோலுரித்துக் காட்டுவதே ஆகும்.
அமெரிக்க வீட்டுவசதி சந்தை மிகவும் பாதுகாப்பானது என்ற பொதுவான நம்பிக்கைக்குப் பின்னால் இருந்த மலிவான கடன்களையும், வங்கிகளின் ஏமாற்று வேலைகளையும் ஒரு சில தனித்துவமான முதலீட்டாளர்கள் தங்களின் நுணுக்கமான ஆய்வுகள் மூலம் கண்டறிகிறார்கள்.
ஒட்டுமொத்த உலகமே அந்தப் போலிப் பொருளாதாரத்தை நம்பிக் கொண்டிருக்கையில், இவர்கள் அதற்கு எதிராகப் பந்தயம் கட்டி வோல் ஸ்ட்ரீட் எனப்படும் நிதித்துறையின் பேராசையை எதிர்கொள்கிறார்கள்.
அமைப்பின் மீதுள்ள அதீத நம்பிக்கையால் எழும் குருட்டுத்தன்மையும், தங்களின் சுயலாபத்திற்காகப் பொதுமக்களின் வாழ்க்கையைத் தாரைவார்த்துத் தரும் பெரும் வங்கிகளின் துரோகமும் இப்படத்தின் மையக்கருத்தாக விளங்குகின்றன.
இறுதிப் பகுதியில், கதையின் நாயகர்கள் தங்களின் கணிப்பு துல்லியமாகப் பலித்ததால் பில்லியன் கணக்கில் லாபம் ஈட்டினாலும், அந்த வெற்றி கொண்டாட்டத்திற்குரியதாக இருப்பதில்லை.
மாறாக, கோடிக்கணக்கான ஏழை எளிய மக்கள் தங்களின் வீடுகளையும் வேலைகளையும் இழந்து நடுத்தெருவிற்கு வரும்போது, இந்தத் தவற்றிற்குப் பொறுப்பான பெரிய வங்கிகளும் அதிகாரிகளும் எந்தவிதத் தண்டனையுமின்றி தப்பித்துவிடுகிறார்கள் என்ற கசப்பான உண்மையை இப்படம் மிக அழுத்தமாகப் பதிவு செய்கிறது.
படத்தில் நடித்த கிறிஸ்டியன் பேல் மற்றும் ஸ்டீவ் கேரல் ஆகியோரின் நடிப்பு உலகளவில் பெரும் பாராட்டைப் பெற்றது. ரையான் கோஸ்லிங் மற்றும் பிராட் பிட் ஆகியோரும் முக்கிய கதாபாத்திரங்களில் தங்களின் சிறந்த நடிப்பை வெளிப்படுத்தியுள்ளனர்.
இயக்குனர் ஆடம் மெக்கே மிகவும் சிக்கலான ஒரு பொருளாதாரப் பின்னணியை சாதாரண மக்களும் எளிதாகப் புரிந்துகொள்ளும் வகையில் விறுவிறுப்பான திரைக்கதையோடும் தனித்துவமான சுவாரஸ்யமான காட்சிகளோடும் இயக்கியுள்ளார்.
இப்படத்திற்கு பேரி அக்ராய்ட் ஒளிப்பதிவு செய்துள்ளார். அவர் ஆவணப்பட பாணியிலான கேமரா நகர்வுகள் மூலம் கதையின் தீவிரத்தன்மையை சிறப்பாகக் காட்சிப்படுத்தியுள்ளார்.
இத்திரைப்படம் சிறந்த தழுவல் திரைக்கதைக்கான அகாடமி விருதை வென்றதுடன் சிறந்த திரைப்படம் சிறந்த இயக்குனர் சிறந்த துணை நடிகர் மற்றும் சிறந்த படத்தொகுப்பு ஆகிய பிரிவுகளில் ஆஸ்கார் விருதுகளுக்குப் பரிந்துரைக்கப்பட்டது.
மேலும் பாஃப்டா விருது, எழுத்தாளர்கள் சங்க விருது மற்றும் சிறந்த நகைச்சுவைத் திரைப்படத்திற்கான கிரிடிக்ஸ் சாய்ஸ் விருது உள்ளிட்ட பல முக்கிய விருதுகளையும் இப்படம் வென்றுள்ளது.
நிதித்துறை சார்ந்த ஒரு தீவிரமான கதையைத் திரைப்படமாக மாற்ற முயன்றபோது, அதன் திரைக்கதைக்குச் சரியான தொனியை அமைப்பதுதான் படக்குழுவினருக்குப் பெரும் சவாலாக இருந்தது.
மிகக் கடுமையான பொருளாதாரக் கலைச்சொற்களையும் சிக்கலான நிதி சார்ந்த விதிகளையும் சாமானிய ரசிகர்களுக்கு எளிமையாக விளக்க வேண்டும் என்பதற்காக, பிரபல நட்சத்திரங்களைக் கொண்டு இடையிடையே காட்சிகளை அமைக்கும் புதுமையான யோசனையை இயக்குனர் கையாண்டார்.
இதற்காக மார்க் பிளாட் போன்ற நிஜ உலகப் பிரபலங்களை படத்தில் சிறப்புத் தோற்றத்தில் நடிக்க வைத்து, சமையல் குறிப்புகள் அல்லது சூதாட்டக் கூடாரத்து உதாரணங்கள் மூலம் பொருளாதாரத்தை விளக்க வைத்தார்.
நடிகர்கள் தேர்வு மற்றும் படப்பிடிப்பின் போதும் சில சுவாரஸ்யங்கள் நிகழ்ந்தன. இப்படத்தில் ஜெரார்ட் வென்னட்டின் உதவியாளராக நடித்த ஜெஃப்ரி கிரிஃபின், உண்மையில் ஒரு சாதாரணப் பின்னணி நடிகராகத்தான் கூட்டத்தில் நின்றிருந்தார்.
ஆனால் அவரது தோற்றமும் உடல்மொழியும் பிடித்துப்போனதால், அங்கிருந்த உதவி இயக்குனர் ஒருவரால் தற்செயலாகத் தேர்ந்தெடுக்கப்பட்டு, பின்னர் வசனம் பேசி நடிக்கும் முக்கிய வாய்ப்பைப் பெற்றார்.
படப்பிடிப்பிற்காக 2008 இல் திவாலாகிப்போன லேமன் பிரதர்ஸ் வங்கியின் அலுவலகத்தை மீண்டும் உருவாக்க வேண்டியிருந்தது.
இதற்காக நியூயார்க் மாநிலத்தின் நிதியியல் சேவைத் துறையின் பிரதான வரவேற்பறையையே லேமன் பிரதர்ஸ் வங்கியின் அலுவலகமாக மாற்றிப் படக்குழுவினர் படப்பிடிப்பை நடத்தினர்.
மேலும், நிஜ வாழ்க்கையில் இந்த நிதி நெருக்கடியை எதிர்கொண்ட மனிதர்களின் ஆவணப் பதிவுகளை நடிகர்கள் படித்துப் பார்த்தபோது, தாங்கள் காட்டிய கோபமும் தீவிரமும் உண்மைக்கு மிக நெருக்கமாக இருந்ததை அவர்கள் உணர்ந்துகொண்டனர்.
எழுத்தாளர் மைக்கேல் லூயிஸின் முந்தைய புத்தகமான மனி பால் திரைப்படத்தில் நடித்து ஆஸ்கார் பரிந்துரை பெற்றிருந்த பிராட் பிட், இந்தத் திட்டத்தின் முக்கியத்துவத்தை உணர்ந்து தனது பிளான் பி என்டர்டெயின்மென்ட் நிறுவனம் மூலம் இதனைத் தயாரிக்க முன்வந்தார்.
அவர் பெரிய நட்சத்திரங்களை இப்படத்திற்குள் கொண்டு வந்ததோடு மட்டுமன்றி, பென் ரிக்கர்ட் என்ற ஓய்வுபெற்ற வர்த்தகர் கதாபாத்திரத்திலும் தானே விரும்பி நடித்தார்.
கிறிஸ்டியன் பேல் தான் ஏற்ற மைக்கேல் பர்ரி கதாபாத்திரத்திற்காகப் பல மாதங்கள் தீவிரமாகத் தயாரானார்.
நிஜ வாழ்க்கையின் பர்ரியைச் சந்தித்துப் பேசியது மட்டுமன்றி, படத்தில் பர்ரி அணிந்திருக்கும் அதே அசல் ஆடைகளையே வாங்கி அணிந்து நடித்தார்.
குறிப்பாக, பர்ரிக்கு ஒரு கண் செயற்கைக் கண் என்பதால், அவரது தனித்துவமான பார்வையைத் திரையில் கொண்டுவர பேல் கடினமாக உழைத்தார்.
நிஜ பர்ரி ஹெவி மெட்டல் இசையை ரசிப்பவர் என்பதால், பேல் படப்பிடிப்பின் போது டிரம்ஸ் வாசிக்கக் கற்றுக்கொண்டு அந்த காட்சிகளில் தத்ரூபமாக நடித்தார்.
அதேபோல், ஸ்டீவ் கேரல் தனது கதாபாத்திரத்தின் நிஜ வடிவமான ஸ்டீவ் ஈஸ்மனைப் பிரதிபலிக்க அவரது உடல்மொழி மற்றும் நடையுடை பாவனைகளைத் தீவிரமாக ஆராய்ந்தார்.
படத்தில் காட்டப்படும் மார்க் பாம் என்ற கதாபாத்திரம் எந்நேரமும் கோபமாகவும் விரக்தியுடனும் வோல் ஸ்ட்ரீட் வங்கிகளைச் சாடுவது போல் வடிவமைக்கப்பட்டிருந்தது.
படப்பிடிப்பின் போது நியூ ஆர்லியன்ஸ் மற்றும் மேன்ஹாட்டனின் பரபரப்பான தெருக்களில் நிஜமான வங்கிகள் இயங்கும் பகுதிகளிலேயே காட்சிகள் படமாக்கப்பட்டதால், நடிகர்களுக்கு அந்த நிஜ உலக நிதிச் சூழலின் தீவிரத்தன்மை இயல்பாகவே கைவந்தது.
படத்தின் இறுதி வடிவத்தைக் கொண்டுவருவதில் படத்தொகுப்பாளர் ஹேங்க் கோர்வின் மிகப்பெரிய பங்களிப்பை வழங்கினார். பாரம்பரியமான நேர்க்கோட்டுப் பாணியைத் தவிர்த்து, ஆவணப்படத் தன்மையுடன் கூடிய வேகமான வெட்டுக்கள், திடீர் நிசப்தங்கள் மற்றும் பாத்திரங்கள் கேமராவைப் பார்த்துப் பேசும் உத்திகளைப் பயன்படுத்தி, படத்தின் விறுவிறுப்பை இறுதிவரை தக்கவைத்தார்.
படம் வெளியான பிறகு, நிதித்துறையைச் சேர்ந்த நிபுணர்கள் இதன் துல்லியத் தன்மையைக் கண்டு வியந்தனர். பொதுவாக ஹாலிவுட் திரைப்படங்களில் உண்மைச் சம்பவங்கள் அதிக அளவில் கற்பனை கலந்து மாற்றப்படும்.
ஆனால், இந்தத் திரைப்படம் சுமார் தொண்ணூற்றியொன்று சதவீதத்திற்கும் மேல் நிஜ வரலாற்று நிகழ்வுகளுடன் துல்லியமாக ஒத்துப் போவதாகப் பொருளாதார ஆய்வாளர்கள் சான்றளித்தனர்.
மிகவும் ஆச்சரியமான விஷயமாக, படம் வெளியாகிப் பல ஆண்டுகள் கடந்த பின்னரும், 2021 ஆம் ஆண்டில் நடந்த கேம்ஸ்டாப் நிறுவனப் பங்குகளின் அதிரடி வர்த்தகச் சூதாட்டத்தின் போது உலகெங்கும் உள்ள முதலீட்டாளர்கள் இந்தத் திரைப்படத்தை ஒரு முக்கிய வழிகாட்டியாகக் குறிப்பிட்டு இணையத்தில் விவாதித்தனர்.
வால் ஸ்ட்ரீட்டின் தற்போதைய தந்திரங்களைப் புரிந்துகொள்ள இப்போதும் பலரால் தேடிப் பார்க்கப்படும் ஒரு பாடப்புத்தகமாக இத்திரைப்படம் மாறியதே இதன் இறுதி வெற்றியாகக் கருதப்படுகிறது.
==============================
படத்தின் கதை:-
2005 ஆம் ஆண்டில், மைக்கேல் பர்ரி (கிறிஸ்டியன் பேல்) என்ற விசித்திரமான இன்வெஸ்ட்மெண்ட் பேங்கர், ஹெட்ஜ் ஃபண்ட் மேலாளர், அமெரிக்க வீட்டுவசதி சந்தையானது சப் பிரைம் கடன்களின் காரணமாக மிகவும் நிலையற்றதாக இருப்பதை எதிர்பாராதவிதமாகத் தன் ஆய்வின் மூலம் கண்டறிகிறார்.
1930களின் பெரும் பொருளாதார வீழ்ச்சிக்கும் தற்போதைய சந்தை நிலைமைக்கும் இடையே உள்ள ஒற்றுமைகளை ஆராய்ந்த அவர், இந்த வீட்டுவசதி சந்தையானது 2007 ஆம் ஆண்டின் தொடக்கத்தில் முற்றிலும் சரிந்துவிடும் என்று துல்லியமாகக் கணக்கிடுகிறார்.
இந்த வீழ்ச்சியிலிருந்து லாபம் ஈட்ட நினைக்கும் பர்ரி, சந்தை வீழ்ச்சிக்கு எதிராகப் பந்தயம் கட்டுவதற்காகப் பெரிய முதலீட்டு மற்றும் வணிக வங்கிகளை நேரில் சந்தித்து கிரெடிட் டிஃபால்ட் ஸ்வாப்ஸ் எனப்படும் காப்பீட்டு ஒப்பந்தங்களை வாங்குகிறார்.
இதற்காக அவர் வங்கிகளுக்கு ஒவ்வொரு மாதமும் கணிசமான தொகையை பிரீமியமாகச் செலுத்த வேண்டிய கட்டாயம் ஏற்படுகிறது.
இவ்வாறு பர்ரி செலுத்தும் பெரும் பிரீமியம் தொகையானது அவரது முதலீட்டு நிதியையே முழுமையாக காலி செய்துவிடும் என்பதால், அவரது முதன்மை வாடிக்கையாளரான லாரன்ஸ் ஃபீல்ட்ஸ் (ட்ரேசி லெட்ஸ்) கடும் கோபமடைந்து பர்ரியிடம் சண்டையிடுகிறார்.
பர்ரியின் கணிப்பு தவறானால் நிதி முற்றிலும் திவாலாகிவிடும் என்று அவர் எச்சரித்த போதிலும், பர்ரி தனது முடிவில் உறுதியாக நிற்கிறார்.
இதற்கிடையில் ஜெர்மன் வங்கியான டாய்ச் வங்கியின் நிர்வாகி ஒருவர், பர்ரி மேற்கொண்ட இந்த விசித்திரமான ஒப்பந்தங்கள் பற்றித் தனது சக ஊழியரான ஜாரெட் வென்னட்டிடம் (ரையான் கோஸ்லிங்) தற்செயலாகக் குறிப்பிடுகிறார்.
சந்தையின் இந்த பலவீனத்தில் தனக்கான ஒரு பெரிய வாய்ப்பு இருப்பதை உணரும் வென்னட், வீட்டுவசதி சந்தைக்கு எதிராகச் சூதாட மற்ற முதலீட்டாளர்களைத் திரட்ட முயற்சிக்கிறார்.
இந்த முயற்சியின் போது அவர் தவறுதலாக ஃப்ரண்ட் பாயிண்ட் பார்ட்னர்ஸ் என்ற நிறுவனத்தின் வர்த்தகர் ஒருவரைத் தொலைபேசியில் அழைக்கிறார்.
வென்னட்டின் இந்தத் திட்டத்தில் அந்த நிறுவனத்தினர் மிகுந்த ஆர்வம் காட்டுகிறார்கள். வால் ஸ்ட்ரீட் சந்தையில் நிலவும் மோசடிகளையும், பார்ப்பதற்கு மிகவும் பாதுகாப்பானதாகத் தோன்றும் கடன் பத்திரங்களின் பின்னணியில் இருக்கும் ஏமாற்று வேலைகளையும் வென்னட் அவர்களுக்கு நேரில் விளக்குகிறார்.
வங்கித் துறையின் ஒட்டுமொத்த செயல்பாட்டு முறையின் மீதே கடுமையான அதிருப்தியில் இருக்கும் ஃப்ரண்ட் பாயிண்ட் நிறுவனத்தின் தலைவரான மார்க் பாம் (ஸ்டீவ் கேரல்), வென்னட்டின் இந்த விளக்கத்தால் ஈர்க்கப்படுகிறார்.
வென்னட்டின் கூற்றுகள் உண்மையானவைதானா என்பதை நேரடியாகக் களத்தில் இறங்கி ஆராய முடிவு செய்யும் மார்க் பாமின் குழுவினர், தெற்கு புளோரிடா பகுதிக்குப் பயணம் மேற்கொள்கிறார்கள்.
அங்கு மக்கள் யாரும் வசிக்காத வெறிச்சோடிய குடியிருப்புகளையும், வாடிக்கையாளர்களை ஏமாற்றிப் போலி ஆவணங்கள் மூலம் கடன் கொடுத்ததாக ஒப்புக்கொள்ளும் அடமானத் தரகர்களையும் நேரில் சந்தித்து உண்மையை அறிகிறார்கள்.
அதன் பின்னர், சந்தை வீழ்ச்சிக்கு எதிராக வென்னட் மூலமாக முதலீடு செய்ய மார்க் பாமின் குழு உறுதியான முடிவு எடுக்கிறது.
மற்றொரு பக்கத்தில், சார்லி கெல்லர் (ஜான் மகாரோ) மற்றும் ஜேமி ஷிப்லி (ஃபின் விட்ராக்) என்ற இரண்டு இளம் முதலீட்டாளர்கள், ஜேபி மார்கன் சேஸ் வங்கியின் வரவேற்பறையில் இருந்த ஒரு காபி மேஜையின் மீது தற்செயலாகக் கிடந்த வென்னட்டின் திட்ட அறிக்கையைக் கண்டெடுக்கிறார்கள்.
அதில் கூறப்பட்டிருந்த மாபெரும் லாப வாய்ப்புகளைப் பார்த்த உடனேயே அவர்கள் இருவரும் இதில் முதலீடு செய்ய முழுமையாகக் சம்மதிக்கிறார்கள்.
ஆனால் அவர்களின் முதலீட்டு நிதியின் அளவு மிகவும் சிறியதாக இருந்ததால், இத்தகைய பெரிய வர்த்தகத்தைச் செய்ய அவர்களுக்குப் பெரிய வங்கியின் அங்கீகாரம் தேவைப்படுகிறது.
இதற்காக அவர்கள் ஜேமியின் சிறுவயது அண்டை வீட்டுக்காரரும், ஓய்வுபெற்ற புகழ்பெற்ற பத்திர வர்த்தகருமான பென் ரிக்கர்ட்டின் (பிராட் பிட்) உதவியை நாடுகிறார்கள்.
அவர்களின் வேண்டுகோளை ஏற்று அவர்களுக்கு உதவ பென் ரிக்கர்ட் ஒப்புக்கொள்கிறார். இதனைத் தொடர்ந்து இந்த மூவர் கூட்டணியும் கிரெடிட் டிஃபால்ட் ஸ்வாப்ஸ் பத்திரங்களில் தீவிரமாக முதலீடு செய்யத் தொடங்குகிறது.
2007 ஆம் ஆண்டின் தொடக்கத்தில், எதிர்பார்த்தபடியே கடன் தவணைகளைத் திருப்பிச் செலுத்தாதவர்களின் எண்ணிக்கை சந்தையில் பெருமளவு அதிகரிக்கத் தொடங்குகிறது.
இருப்பினும், கிரெடிட் டிஃபால்ட் ஸ்வாப்ஸ் மற்றும் கொலாட்டரலைஸ்டு டெப்ட் அபிலிகேஷன்ஸ் எனப்படும் சிடிஓ பத்திரங்களின் மதிப்புகள் வீழ்ச்சியடையாமல் விவரிக்க முடியாத அளவிற்கு விசித்திரமாக உயர்கின்றன.
அதோடு அவற்றின் கடன் தரவரிசை மதிப்பீடுகளும் நிலையாக நீடிக்கின்றன. இதனால் பர்ரிக்கு வர வேண்டிய லாபப் பணம் எதுவும் கிடைக்காமல் அவர் பெரும் போராட்டத்தை எதிர்கொள்கிறார்.
மேலும் அவரது நிதியில் இருந்து முதலீட்டாளர்கள் தங்கள் பணத்தைத் திரும்பப் பெறுவதைத் தடுப்பதற்காக, பணத்தை எடுப்பதற்கான அனுமதியை பர்ரி தற்காலிகமாக முடக்குகிறார்.
இதனால் கோபமடைந்த லாரன்ஸ் ஃபீல்ட்ஸ் அவர் மீது நீதிமன்றத்தில் வழக்குகிறார். சந்தையின் இந்த விசித்திரமான போக்கைப் புரிந்துகொள்ள முயலும் மார்க் பாம், ஸ்டாண்டர்ட் அண்ட் புவர்ஸ் என்ற கடன் தர நிர்ணய நிறுவனத்தின் அதிகாரி ஒருவரிடம் பேசுகிறார்.
முதலீட்டு வங்கிகள் தங்களின் வாடிக்கையாளர் வணிகத்தைத் தக்கவைத்துக்கொள்வதற்காக, கடன் தர நிர்ணய முகமைகள் எவ்வாறு கூட்டுச் சேர்ந்து கூட்டு மோசடியில் ஈடுபடுகின்றன என்ற உண்மையை அவர் கண்டறிகிறார்.
வங்கிகள் வேண்டுமென்றே பெரிய அளவில் மோசடி செய்வதாக சார்லி கெல்லர் சந்தேகிக்கிறார். இதனால் அவரும் ஜேமியும் பென் ரிக்கர்ட்டும் அமெரிக்க செக்யூரிட்டிஷேஷன் ஃபோரம் என்ற மாநாட்டிற்கு நேரில் செல்கிறார்கள்.
அங்குள்ள வங்கி அதிகாரிகள் சந்தையின் கடன் முறிவுகள் பற்றி எவ்விதக் கவலையுமின்றி அலட்சியமாக இருப்பதை அவர்கள் பார்க்கிறார்கள்.
அதே நேரத்தில், அடமானம் சார்ந்த பத்திரங்களின் செயல்பாடுகளைக் கண்காணிக்க எஸ்சி எனப்படும் செக்யூரிட்டீஸ் அண்ட் எக்ஸ்சேஞ்ச் கமிஷனிடம் முறையான விதிகள் எதுவும் இல்லை என்பதை ஜேமி அறிந்துகொள்கிறார்.
கீழ்மட்டப் பத்திரங்கள் தோல்வியடைந்தால் உயர் தரவரிசையில் உள்ள பத்திரங்களும் கண்டிப்பாகத் தோல்வியடையும் என்பதை உணரும் சார்லி, உயர் தரவரிசைப் பத்திரங்களுக்கு எதிராகவும் பந்தயம் கட்ட ஜேமியையும் பென் ரிக்கர்ட்டையும் சம்மதிக்க வைக்கிறார்.
இதே மாநாட்டிற்கு வென்னட்டும் ஃப்ரண்ட் பாயிண்ட் குழுவினரும் வருகிறார்கள். அங்கு ஒரு சிடிஓ மேலாளரை மார்க் பாம் நேர்காணல் செய்யும்போது, உண்மையான அடமானச் சந்தையை விட செயற்கை சிடிஓக்களின் சந்தை இருபது மடங்கு பெரியதாக வளர்ந்திருப்பதை அறிந்து அதிர்ச்சியடைகிறார்.
இதன் மூலம் ஒட்டுமொத்த உலகப் பொருளாதாரமும் முற்றிலும் அழியப் போகிறது என்பதை மார்க் பாம் உணர்கிறார்.
இதற்கிடையில் சப் பிரைம் கடன் வழங்குவதில் முன்னணியில் இருந்த நியூ செஞ்சுரி ஃபைனான்சியல் நிறுவனம் திடீரென திவாலாகிப் போனதை சார்லியும் ஜேமியும் பார்க்கிறார்கள்.
வீட்டுவசதி சந்தையின் குமிழி வெடிக்கத் தொடங்கிவிட்டதற்கான அசல் அறிகுறி இதுதான் என்பதை அவர்கள் அடையாளம் காண்கிறார்கள்.
அதே காலகட்டத்தில், பியர் ஸ்டெர்ன்ஸ் நிறுவனம் தனது ஹெட்ஜ் ஃபண்டுகளைக் கலைத்து வருவதை மார்க் பாம் கண்டறிகிறார்.
மறுபுறம் பர்ரி வங்கிகளைத் தொடர்பு கொள்ள முயலும்போது, வங்கிகள் அவரது தொலைபேசி அழைப்புகளை வேண்டுமென்றே புறக்கணிக்கின்றன.
சந்தையில் கடனைத் திருப்பிச் செலுத்தாதவர்களின் எண்ணிக்கை தொடர்ந்து அதிகரித்த போதிலும், பத்திரங்களின் விலைகள் நிலையாக இருப்பதன் பின்னணியில் உள்ள தந்திரத்தை சார்லியும் ஜேமியும் புரிந்துகொள்கிறார்கள்.
சந்தை முழுமையாக வீழ்வதற்கு முன்னால், வங்கிகள் தங்களின் வசம் உள்ள பத்திரங்களை விற்று லாபம் பார்ப்பதற்காகவும், தாங்களே அதற்கு எதிராகச் சூதாடுவதற்காகவும் பத்திரங்களின் விலைகளைச் செயற்கையாக முடக்கி வைத்துள்ளன என்பதை அவர்கள் அறிகிறார்கள்.
இதனால் ஆத்திரமடைந்த அவர்கள், வால் ஸ்ட்ரீட் ஜர்னல் இதழில் பணிபுரியும் தங்களின் பழைய நண்பரைத் தொடர்பு கொண்டு இந்த மாபெரும் மோசடியைச் செய்தியாக வெளியிடக் கோருகிறார்கள். ஆனால் முதலீட்டு வங்கிகளுடன் தனக்கு இருக்கும் வணிக உறவுகளைக் காப்பாற்றிக் கொள்வதற்காக, அந்த நண்பர் இக்கட்டுரையை எழுத மறுத்துவிடுகிறார்.
சப் பிரைம் பத்திரங்களின் மதிப்பு தொடர்ந்து பாதாளத்தை நோக்கிச் சரியும்போது, மார்க் பாமின் ஃப்ரண்ட் பாயிண்ட் நிறுவனத்தை நடத்தும் மார்கன் ஸ்டான்லி வங்கியும் இந்த அடமானப் பத்திரங்களுக்கு எதிராகச் சூதாடியிருப்பதை பாம் அறிந்துகொள்கிறார்.
ஆனால், மார்கன் ஸ்டான்லி வங்கி ஆபத்தைக் குறைப்பதற்காக உயர் தரவரிசைப் பத்திரங்களை விற்று ஈடுகட்ட முயன்றிருந்தது. தற்போது அந்த உயர் தரவரிசைப் பத்திரங்களும் சரிந்துவிட்டதால், மார்கன் ஸ்டான்லி வங்கி கடுமையான நிதி நெருக்கடியைச் சந்திக்கிறது.
மார்கன் ஸ்டான்லி வங்கி முற்றிலும் திவாவாவதற்கு முன்னால், தங்களின் வசம் உள்ள லாபகரமான பத்திரங்களை விற்றுவிடுமாறு பாமின் ஊழியர்கள் அவரை வற்புறுத்துகிறார்கள்.
ஆனால் மார்க் பாம் அவற்றை விற்க மறுத்து விடுகிறார். அதே நேரத்தில் இங்கிலாந்தில் விடுமுறையில் இருக்கும் பென் ரிக்கர்ட், சார்லி மற்றும் ஜேமியின் பத்திரங்களை விற்றுத் தீர்க்கிறார்.
இதன் மூலம் அந்த இரு இளைஞர்களுக்கும் மாபெரும் லாபம் கிடைக்கிறது. இருப்பினும், வெளிநாட்டு வங்கி அமைப்புகளும் அடுத்தடுத்து சரியத் தொடங்கிவிட்டன என்ற செய்தியை பென் அவர்களுக்குத் தெரிவிக்கும்போது, ஒட்டுமொத்தப் பொருளாதார அமைப்பின் மீதே அவர்கள் வைத்திருந்த நம்பிக்கை முற்றிலுமாக உடைகிறது.
வங்கிகள் தாங்கள் வாங்கிய ஒப்பந்தங்களுக்குப் பணம் தருவதற்காகப் பர்ரியை அவசரமாகத் தொடர்பு கொள்ளத் தொடங்குகின்றன. இறுதியில் பர்ரியின் Scion Capital நிறுவனம் 2.69 பில்லியன் டாலர் லாபத்தை ஈட்டுகிறது.
இதில் லாரன்ஸ் ஃபீல்ட்ஸ் மட்டுமே 489 மில்லியன் டாலர்களைப் பெறுகிறார். மார்க் பாம் ஒரு தொழில்முறை மாநாட்டில் பேசிக் கொண்டிருக்கும்போதே, பியர் ஸ்டெர்ன்ஸ் வங்கியின் பங்குகள் வெறும் பத்து நிமிடங்களில் முப்பத்தியெட்டு சதவீதம் வீழ்ச்சியடைந்த செய்தி அவரது குழுவினருக்குத் தெரியவருகிறது.
அதன் பின்னரே அந்த வங்கி முற்றிலும் வீழ்கிறது. மார்க் பாம் இறுதியாகத் தனது பத்திரங்களை விற்று ஒரு பில்லியன் டாலருக்கும் மேல் லாபம் ஈட்டுகிறார்.
ஆயினும், இந்த மாபெரும் அழிவிற்கு வங்கிகளோ அரசாங்கமோ எவ்விதப் பொறுப்பையும் ஏற்கப்போவதில்லை என்பதை நினைத்து அவர் மிகுந்த மனவருத்தம் அடைகிறார்.
இந்த மாபெரும் நிதி நெருக்கடி வர்த்தகத்தின் மூலம் தான் ஈட்டிய லாபத்திற்காக வென்னட் ஒரு மிகப்பெரிய போனஸ் தொகையைப் பெற்றுக் கொள்கிறார்.
ஃப்ரண்ட் பாயிண்ட் நிறுவனம் எப்போதும் போலத் தனது வழக்கமான பணிகளைத் தொடர்கிறது. ஆனால் பர்ரி பொதுமக்களிடமிருந்தும் முதலீட்டாளர்களிடமிருந்தும் வந்த கடுமையான விமர்சனங்கள் மற்றும் எதிர்ப்புகளின் காரணமாகத் தனது முதலீட்டு நிதியை நிரந்தரமாக மூடிவிடுகிறார்.
கடன் தர நிர்ணய முகமைகளுக்கு எதிராக வழக்குத் தொடர முயன்று தோல்வியடைந்த சார்லியும் ஜேமியும் தங்கள் பாதைகளில் பிரிந்து செல்கிறார்கள்.
பென் ரிக்கர்ட் மீண்டும் தனது அமைதியான ஓய்வு வாழ்க்கைக்குத் திரும்புகிறார். படத்தின் இறுதிப் பகுதியில், இந்த மாபெரும் உலகப் பொருளாதாரப் பேரழிவிற்குத் துணையாக இருந்த பெரிய வங்கிகளின் அதிகாரிகள் எவரும் தங்களின் தவறுகளுக்காக எந்தவிதத் தண்டனையையும் சட்டரீதியாக எதிர்கொள்ளவில்லை என்பதும், கரீம் செராகெல்டின் என்ற ஒரே ஒரு வர்த்தகர் மட்டுமே சிறையில் அடைக்கப்பட்டார் என்பதும் சுட்டிக்காட்டப்படுகிறது.
மேலும், தற்போதைய வங்கிகள் அதே பழைய சிடிஓ பத்திரங்களை பெஸ்போக் ட்ரான்ச் ஆப்பர்சூனிட்டி என்ற புதிய பெயரில் மீண்டும் சந்தையில் விற்கத் தொடங்கியுள்ளன என்ற அதிர்ச்சியூட்டும் உண்மையுடன் திரைப்படம் நிறைவடைகிறது.
இத்திரைப்படம் உலகிற்குச் சொல்லும் மிக முக்கியமான நிதித்துறையின் எல்லையற்ற பேராசையும், அதைக் கண்காணிக்கும் அமைப்புகளின் பொறுப்பற்ற தன்மையும் எப்போதும் எளிய பாமர மக்களையே பலியாக்குகின்றன என்பதுதான்.
சாதாரண மனிதர்கள் தங்களின் கடின உழைப்பால் சேர்க்கும் சேமிப்பும், அவர்கள் காணும் ஒரு சொந்த வீடான எளிய கனவும், வோல் ஸ்ட்ரீட் போன்ற பெரிய முதலீட்டு வங்கிகளுக்கு வெறும் எண்களாகவும் தங்களின் பணத்தாசையைத் தீர்க்கும் சூதாட்டக் கருவிகளாகவுமே தெரிகின்றன.
வங்கிகள் தங்களின் சுயலாபத்திற்காக எவ்வளவு பெரிய பொய்களையும், மோசடிகளையும் கட்டமைக்கத் துணியும் என்பதை இப்படம் தோலுரித்துக் காட்டுகிறது.
அதே நேரத்தில், இத்தகைய தவறுகளைத் தடுத்து நிறுத்த வேண்டிய அரசாங்க அமைப்புகளும், கடன் தர நிர்ணய நிறுவனங்களும் தங்களின் சொந்த ஆதாயத்திற்காக வங்கிகளுடன் கூட்டுச் சேர்ந்து திருடர்களாக மாறுகின்றன.
இதனால் ஒட்டுமொத்தப் பொருளாதார அமைப்பே அழியும் நிலைக்குச் செல்கிறது.
இப்படத்தின் இறுதிப் பகுதி உணர்த்தும் கசப்பான உண்மை , இந்த மாபெரும் அழிவிற்குக் காரணமான பெரிய கோடீஸ்வர வங்கிகளின் அதிகாரிகள் எவ்விதத் தண்டனையுமின்றி தங்களின் அதிகார பலத்தால் தப்பித்துக் கொள்கிறார்கள்.
ஆனால், எவ்விதத் தவற்றையும் செய்யாத ஏழை எளிய மக்களே தங்களின் வேலைகளையும், வாழ்நாள் சேமிப்பையும், சொந்த வீடுகளையும் இழந்து நடுத்தெருவில் நிற்கிறார்கள்.
சுருக்கமாகச் சொன்னால், "அமைப்பின் மீதும் அதன் அதிகார வர்க்கத்தின் மீதும் கண்மூடித்தனமான நம்பிக்கை வைக்காமல் எப்போதும் விழிப்புடன் இருக்க வேண்டும்; ஏனெனில் அதிகாரத்தில் இருப்பவர்களின் பேராசைக்கான விலையை எப்போதும் சாமானிய ஜனங்களே தங்களின் வாழ்க்கையைக் கொண்டு செலுத்த வேண்டியிருக்கிறது" என்ற அழுத்தமான எச்சரிக்கையையே இத்திரைப்படம் உலகிற்குச் செய்தியாகச் சொல்கிறது.
#கீதப்ப்ரியன்ஆஸ்கர்
