1962-ஆம் ஆண்டு வெளியான 'டெண்டர் இஸ் த நைட்' திரைப்படம், எஃப். ஸ்காட் ஃபிட்ஸ்ஜெரால்டின் நாவலை அடிப்படையாகக் கொண்டு, ஒரு மேதையான மருத்துவரின் வீழ்ச்சியைப் பேசும் ஒரு மிகச்சிறந்த படைப்பாகும்.
இதில் டிக் டைவராக நடித்த ஜேசன் ரோபட்ஸ், ஒரு மனிதன் தனது லட்சியங்களையும் அடையாளத்தையும் மெல்ல மெல்ல இழக்கும் அந்தத் துயரமான மாற்றத்தை தனது கண்களிலும் உணர்ச்சிகளிலும் மிகத் தத்ரூபமாக வெளிப்படுத்தியிருந்தார்.
நிகோல் டைவராக நடித்த ஜெனிபர் ஜோன்ஸ், ஒரு மனநலம் பாதிக்கப்பட்ட பெண்ணின் நிலையிலிருந்து மீண்டு வந்து, ஒரு அதிகாரமிக்க பெண்ணாக மாறும் அந்தப் பரிமாணத்தை மிகச் சரியாகச் சித்தரித்திருந்தார்.
பேபி வாரனாக வரும் ஜோன் ஃபான்டைன், அந்தப் பணக்கார வர்க்கத்தின் அதிகாரத் தோரணையைத் தனது நடிப்பின் மூலம் மிகத் துல்லியமாகப் பிரதிபலித்திருந்தார்.
திரைக்கதையை, நாவலின் சிக்கலான காலவரிசையை, நிகழ்காலத்தின் ஆடம்பரத்தையும், கடந்த காலத்தின் இருண்ட ரகசியங்களையும் கோர்வையாக இணைத்திருக்கும் விதம் பாராட்டுக்குரியது.
படத்தின் இயக்கம் ஹென்றி கிங்கின் நேர்த்தியான கைவண்ணத்தில் அமைந்துள்ளது.
ஒரு தனிமனிதனின் உளவியல் சிதைவை, சமூகத்தின் மேல்தட்டு வர்க்கத்தின் சலசலப்புகளுக்குப் பின்னால் அவர் மிக நுட்பமாகப் படம்பிடித்திருப்பார்.
படத்தின் ஒளிப்பதிவு, 1920-களின் பிரெஞ்சு ரிவியராவின் வெயில் கொதிக்கும் கடற்கரை ஓரங்களையும், பாரிஸின் ஆடம்பர விடுதிகளையும், கதாபாத்திரங்களின் மனமாற்றங்களுக்கு ஏற்ப மிகச் சிறந்த வண்ண அமைப்பில் படமாக்கியிருக்கும்.
பின்னணி இசையானது, படத்தின் சோகமான அடிநாதத்தை அழுத்தமாகப் பதிவு செய்கிறது.
குறிப்பாக, டிக் டைவர் தனது வாழ்க்கையின் ஒவ்வொரு பகுதியாகத் தொலைக்கும் தருணங்களில் வரும் இசை, பார்வையாளர்களின் மனதை உருக்கும் வகையில் அமைந்துள்ளது.
விருதுகளில், இந்தப் படம் பல விமர்சன ரீதியான பாராட்டுகளைப் பெற்றது. குறிப்பாக, இதற்காக உருவாக்கப்பட்ட 'டெண்டர் இஸ் த நைட்' என்ற தலைப்புப் பாடல், அக்காலகட்டத்தில் மிகவும் பிரபலமடைந்து, சிறந்த இசைக்கான அகாடமி விருது பரிந்துரையையும் பெற்றது.
ஒட்டுமொத்தமாக, ஒரு காதலின் வலி, செல்வத்தின் மாயை, மற்றும் ஒரு மனிதனின் தவிர்க்க முடியாத வீழ்ச்சி ஆகியவற்றை உணர்வுப்பூர்வமாகவும், தொழில்நுட்ப ரீதியாகவும் மிகச்சிறந்த முறையில் இணைத்த படைப்பாக இது திகழ்கிறது.
'Tender Is the Night' (இரவு மென்மையானது) என்ற தலைப்பு, ஜான் கீட்ஸ் எழுதிய புகழ்பெற்ற 'Ode to a Nightingale' என்ற கவிதையிலிருந்து எடுக்கப்பட்டது.
1920-களின் பிரெஞ்சு ரிவியராவில் சொகுசு வாழ்க்கையின் உச்சத்தில் வசிக்கும் ஒரு வெற்றிகரமான மனநல மருத்துவர் மற்றும் அவரது செல்வந்தர் மனைவி, ஒரு இளம் நடிகையின் வருகையால் வெளிப்படும் தங்களின் திருமண வாழ்க்கையின் விரிசல்கள், மற்றும் அந்த உறவைப் பாதுகாக்கும் முயற்சியில் மெல்லத் தனது ஆளுமையையும் லட்சியத்தையும் இழந்து வீழ்ச்சியடையும் ஒருவனின் உளவியல் போராட்டத்தை இப்படைப்பு நுட்பமாக பேசுகிறது.
தன்னைக் கரைத்துக்கொண்டு அடுத்தவரின் வாழ்க்கையைச் செதுக்க நினைக்கும் ஒரு மேதை, அந்த முயற்சியிலேயே தன் அடையாளத்தைத் தொலைத்து, தியாகத்தின் விளிம்பில் நின்றுகொண்டு, இறுதியில் தான் உருவாக்கிய அந்த உறவாலேயே கைவிடப்படும் ஒருவனின் கையறு நிலையே இத்திரைப்படத்தின் அடிநாதம்.
பிரெஞ்சு ரிவியரா ழ பிரான்ஸ் நாட்டின் தென்கிழக்குக் கடற்கரைப் பகுதியில் அமைந்துள்ள ஒரு சொர்க்கபுரியாகும். மெடிட்டரேனியன் கடலின் நீல நிற நீர், தங்க நிற மணற்பாங்கான கடற்கரைகள் மற்றும் மலைகளின் சரிவில் அமைந்துள்ள அழகிய நகரங்களைக் கொண்ட இது, உலகின் மிக ஆடம்பரமான மற்றும் வசீகரமான சுற்றுலாத் தலங்களில் ஒன்றாகும். ஒரு காலத்தில் பிரபுக்களும் கலைஞர்களும் தஞ்சம் புகுந்த இடமான இது, இன்று கோடீஸ்வரர்கள், திரைப்பட நட்சத்திரங்கள் மற்றும் உயர்குடி மக்கள் ஒன்றுகூடும் புகழ்பெற்ற புகலிடமாகத் திகழ்கிறது. பளபளக்கும் சொகுசுப் படகுகள், விலையுயர்ந்த ஹோட்டல்கள் மற்றும் இரவு நேர கேளிக்கைகளுக்குப் புகழ்பெற்ற இது, வாழ்வின் அதீத ஆடம்பரத்தையும் கவித்துவமான அழகையும் ஒரே இடத்தில் வழங்கும் ஒரு பூமியின் சொர்க்கமாகும், இந்த நகரே இப்படத்தின் கதைக்களம்.
படத்தின் கதை:-
1920-களின் பிரெஞ்சு ரிவியராவில், டிக் டைவர் மற்றும் நிகோல் டைவர் தம்பதியினர் சொகுசு வாழ்க்கையின் அடையாளமாகத் திகழ்கின்றனர்.
அவர்கள் தங்கியிருக்கும் வில்லாவைச் சுற்றி எப்போதும் அமெரிக்க வெளிநாட்டவர்கள் மற்றும் நண்பர்களின் கூட்டம் சூழ்ந்திருக்கிறது.
அந்த விடுமுறை காலத்தில், 17 வயது நடிகையான ரோஸ்மேரி ஹோய்ட் மற்றும் அவரது தாயார் அங்கு வருகை தருகிறார்கள்.
இளம் ரோஸ்மேரி, டிக் டைவரின் ஆளுமையால் ஈர்க்கப்பட்டு அவரிடம் நெருக்கம் காட்டுகிறாள், அதேசமயம் நிகோலுடனும் நட்பு கொள்கிறாள்.
ரோஸ்மேரி இந்தத் தம்பதியின் ஆடம்பர வாழ்க்கைக்குப் பின்னால் ஏதோ ஒரு ரகசியம் இருப்பதை உணர்கிறாள்.
ஒரு விருந்தின் போது, நிகோல் கழிவறையில் ஒரு நரம்புத்தளர்ச்சி தொடர்பான பாதிப்புக்கு உள்ளாவதை வயலட் மெக்கஸ்கோ கவனிக்கிறார்.
இதைத் தொடர்ந்து ஏற்படும் மோதலில், வயலட்டின் கணவர் ஆல்பர்ட், நிகோலைப் பாதுகாக்கும் டாமி பார்பனுடன் கடற்கரையில் துப்பாக்கிச் சண்டையில் ஈடுபடுகிறார்.
அந்த நிகழ்வுகளுக்குப் பிறகு அனைவரும் பிரெஞ்சு ரிவியராவிலிருந்து வெளியேறுகிறார்கள்.
சிறிது காலம் கழித்து, பாரிஸில் ரோஸ்மேரி, டிக் மற்றும் நிகோலின் நெருங்கிய துணையாக மாறுகிறாள். அவள் டிக் மீது காதலை வெளிப்படுத்தி அவரை வசப்படுத்த முயற்சி செய்தாலும், அவர் அவளது காதலை நிராகரிக்கிறார்.
இதற்கிடையில், ரோஸ்மேரியின் ஹோட்டல் அறையில் ஜூன பீட்டர்சன் என்ற கறுப்பினத்தவர் கொலை செய்யப்பட்டு கிடப்பது பெரும் பரபரப்பை ஏற்படுத்துகிறது.
இது ரோஸ்மேரியின் சினிமா வாழ்க்கையைப் பாதிக்கும் என்பதால், அவர் மீதான வீண் சந்தேகங்களைத் தவிர்க்க டிக், அந்த ரத்தக் கறை படிந்த உடலை ஹோட்டல் அறையிலிருந்து அப்புறப்படுத்தி மறைக்கிறார்.
இக்கட்டத்தில் கதை பின்னோக்கிச் செல்கிறது. 1917-ஆம் ஆண்டு வசந்த காலத்தில், டிக் டைவர் இளம் மருத்துவர் சுவிட்சர்லாந்தின் சூரிச் நகரில் பிரான்ஸ் கிரிகோரோவியஸ் என்ற மனநல மருத்துவரைச் சந்திக்கிறார்.
அங்கு நோயாளியாக இருக்கும் நிகோல் வாரனை அவர் பார்க்க நேர்கிறது. தந்தையினால் பாலியல் ரீதியாகப் பாதிக்கப்பட்ட நிகோலின் மனநிலை சிதைந்து கிடக்கிறது.
தொடர் கடிதப் பரிமாற்றங்கள் மற்றும் மருத்துவ சிகிச்சையின் மூலம் நிகோல் டிக் மீது காதல் கொள்கிறாள்.
நோயாளிக்கும் மருத்துவருக்கும் இடையிலான 'புளோரன்ஸ் நைட்டிங்கேல் சிண்ட்ரோம்' என்ற நிலைக்கு ஆளாகும் டிக் (ஜேசன் ரோபட்ஸ்), நிகோலின் மனநலத்தை மேம்படுத்த அவளைத் திருமணம் செய்துகொள்ள முடிவெடுக்கிறார்.
திருமணத்திற்குப் பிறகு, பிரான்ஸ் கிரிகோரோவியஸின் கிளினிக்கில் டிக் பங்குதாரராக சேர்கிறார்.
நிகோலின் பெரும் செல்வம் அந்த நிறுவனத்திற்கு முதலீடாகப் பயன்படுகிறது. தந்தையின் மறைவுக்குப் பிறகு, டிக் அமெரிக்கா சென்றுவிட்டு, ரோஸ்மேரியைச் சந்திக்க ரோமுக்குச் செல்கிறார்.
அங்கு அவர்களுக்கிடையிலான குறுகிய காலக் காதல் வலியுடன் முடிகிறது.
மனமுடைந்த டிக், இத்தாலிய போலீசாருடன் மோதலில் ஈடுபட்டு அடிவாங்க, நிகோலின் சகோதரி அவரைச் சிறையிலிருந்து மீட்கிறார்.
இந்தச் சம்பவம் டிக்கின் கௌரவத்தைச் சிதைக்க, அவர் மதுவுக்கு அடிமையாகிறார்.
இதனால் அவரது மருத்துவத் தொழில் பாதிக்கப்பட்டு, கிளினிக்கின் பங்குகளை விற்க வேண்டிய கட்டாயம் ஏற்படுகிறது.
காலப்போக்கில், ரோஸ்மேரியின் மீதான ஏக்கம் டிக்கின் வாழ்க்கையைச் சிதைக்கிறது.
ரோஸ்மேரி ஹாலிவுட்டில் வெற்றிகரமான நட்சத்திரமாக வளர, டிக் தனது சுயநம்பிக்கையை இழந்து, அனைவரிடமும் எகத்தாளமாகவும் முரட்டுத்தனமாகவும் மாறுகிறார்.
அவரது மதுப்பழக்கம் சமூக சூழலில் அவரை ஒரு கேலிப்பொருளாக மாற்றுகிறது.
டிக் தன்னை இழந்த நிலையில், நிகோல் டாமி பார்பனுடன் காதல் வயப்படுகிறாள்.
இறுதியில், நிகோல் டிக்கை விவாகரத்து செய்துவிட்டு, டாமி பார்பனைத் திருமணம் செய்துகொள்கிறாள்.
ஒரு மேதையான மருத்துவர், தான் காப்பாற்றிய நோயாளியின் அன்பு மற்றும் தனது சொந்தப் பலவீனங்களுக்கிடையில் சிக்கித் தன் அடையாளத்தை இழந்த துயரமான தருணத்தில் படம் நிறைகிறது.
அளவற்ற அன்பும், தியாகமும், பெரும் செல்வமும் ஒரு மனிதனின் ஒழுக்கத்தையும், லட்சியங்களையும் கூட மெல்ல மெல்ல சிதைத்து, இறுதியில் அவனைத் தன் சொந்த அடையாளத்தையே இழக்கச் செய்துவிடும் என்ற கசப்பான யதார்த்தத்தை இத்திரைப்படம் எச்சரிக்கையாக முன்வைக்கிறது.
#கீதப்ப்ரியன்இங்லிஷ்க்ளாஸிக்
