The Favorite | 2018 | அபாரமான தனித்துவமான அவல நகைச்சுவை திரைப்படம் இது, இங்கிலாந்து , அமெரிக்கா, அயர்லாந்து மூன்று நாட்டு கூட்டுத் தயாரிப்பில் மிகுந்த பொருட்செலவில் உருவான படைப்பும் கூட,
எனக்கு Queen Anne ன் கதையை இத் திரைப்படத்தில் பார்க்கும் முன்னரே இந்த மகாராணியின் பெயர் பரீட்சயம் உண்டு, பழம்பெரும் ஸகாட்ச் விஸ்கி பிராண்டான "Queen Anne" Dubai Duty Free ல் வைத்துப் பார்த்திருக்கிறேன்,
எழுத்தாளர் Deborah Davis மற்றும் Tony McNamara இரவரின் திரைக்கதையில் இயக்குனர் Yorgos Lanthimos இயக்கிய திரைப்படம், இவர் இப்படத்தின் ஒரு தயாரிப்பாளரும் கூட, இவரின் Lobster , The killing of a Sacred Deer திரைப்படங்கள் அபாரமானவை.
18 ஆம் நூற்றாண்டின் முற்பகுதி இங்கிலாந்து அரசவை ஒரு அல்லி தர்பாராகவே விளங்கிற்று, இது தான் கதைக்களம்,
இரு ஒன்றுவிட்ட சகோதரிகளான சாரா (Rachel Weisz) மற்றும் அபிகெய்ல் மாஷம் (Emma Stone) இருவருக்கும் இங்கிலாந்து மகாராணி அன்னியுடனான (Olivia Colman) அந்தரங்க உறவை போட்டிகளை துவேஷத்தை கருவறுத்தலை தத்ரூபமாக சித்தரிக்கும் திரைப்படம் இது.
பெண் எழுத்தாளர் டெபோரா டேவிஸ் 1998 ஆம் ஆண்டில் தி ஃபேவரிட் கதையை எழுதினார். இவருக்கு திரைப்படம் எழுதுவதற்கான முன் அனுபவம் இல்லை,மிகுந்த ஆர்வத்துடன் மாலை வகுப்பில் திரைக்கதை எழுதுவது எப்படி வகுப்பில் சேர்ந்து படித்தவர்.
The balance of Power என்ற தலைப்பில் இப்படத்தின் திரைக்கதைக்கான முதல் வரைவை தயாரிப்பாளர் Ceci Dempsey இடம் முடித்துத் தர, தயாரிப்பாளருக்கு மகாராணி அன்னி, சாரா சர்ச்சில் மற்றும் அபிகைல் மாஷம் என்ற இம்மூன்று பெண்களின் அந்தரங்க உறவுகள் பற்றித் தெரிந்து வைத்திருந்தவர், இந்த அற்புதமான கதையைப் படமாக்க இசைந்தார்,
எழுத்தாளர் டெபோரா டேவிஸ் மகாராணி Anne , Sarah மற்றும் Abigail எழுதிய கடிதங்களைப் ஊன்றிப் படித்து thesis செய்தார் ,அவர் செய்த அபாரமான ஆராய்ச்சி இந்த இரு நூற்றாண்டுகளுக்கு முந்தைய திரைக்கதைக்கு உயிரூட்டியது என்றால் மிகையில்லை,
1711ஆம் ஆண்டு இப்படம் துவங்குகிறது,
இங்கிலாந்தின் அண்டை நாடான பிரான்ஸுடன் போரில் ஈடுபட்டுள்ளது, இங்கு மகாராணி anne உடல்நிலையோ சரியில்லை, ஆனாலும் அரசாட்சியை யாருக்கும் விட்டுக் கொடுப்பதில்லை, வாரிசுகளற்ற விதவையான இவர் தொடர்ந்து ஆள்வதற்கு ஆர்வம் காட்டுகிறார், நடக்க முடிந்தாலும் கால் வலியினால் சக்கர நாற்காலியில் வலம் வருகிறார், இவருக்கு உடம்பில் நீரழிவுநோய் உச்சத்தில் உள்ளது, பார்வை குன்றியுள்ளது, உயர் ரத்த அழுத்தம், கொழுப்பு, கிட்னி நோய் என அடுக்கடுக்கான நோய்கள் இவரை அயற்சியில் தள்ளி அந்தப்புரத்தில் அம்ச தூளிகா மஞ்சத்திலேயே கிடத்தி விட்டன.
17 எண்ணிக்கையில் பந்தய வாத்துகள், மற்றும் 17 எண்ணிக்கையில் வளர்ப்பு முயல்களுடன் தன் அந்தப்புரத்தில் போட்டி பந்தயங்கள் வைத்து அனுதினம் விளையாடுகிறார், அவர் கருவில் சிதைந்த குழந்தைகளின் எண்ணிக்கை 17 என்பதை நாம் மெல்ல அறிகிறோம்.
அழகிய உயிர்த்தோழி சாரா சர்ச்சில் மகாராணியின் நிழல், தமிழக அரசியலில் சின்னம்மா போல நம்பிக்கைக்குரியவர், ஐயத்துக்கு அப்பார்பட்டவர். மகாராணி இரு பால் ஈர்ப்பாளரும் கூட,
அரசியல் ஆலோசகர் மற்றும் உற்சாகமான தீராக்காதலியான சாரா சர்ச்சில் மகாராணி தந்த பெரும் செல்வாக்கின் மூலம் நாட்டை திறம்பட ஆட்சி செய்கிறார். இவர் சொடுக்குப் போட்டால் அமைச்சர்கள் அதிரந்து பம்முகின்றனர்.
மகாரணி Anneயைக் மயக்கி பெட்டிப்பாம்பாக வைத்து ஆட்சியை கையில் வைத்திருக்கும் சாராவை எதிர்க்கட்சித் தலைவர் ராபர்ட் ஹார்லி மட்டும் மதிப்பதேயில்லை, அவள் கொண்டு வரும் எந்த திட்டத்திற்கும் முட்டுக்கட்டையாக இருக்கிறார்.
அவர் ஒரு நில உரிமையாளர் ஆதலால் ஃப்ரான்ஸுக்கு எதிராக நடக்கும் போருக்கு நிதியளிப்பதற்கு வேண்டி மகாராணி மற்றும் உயிர்த்தோழி சாராவால் முன்மொழியப்பட்ட சொத்து வரிகளை இரட்டிப்பாக்குவதற்கு எதிராக கடுமையாக வாதிடுகிறார்.
மகாராணியின் உயிர்த்தோழி சாராவின் வறிய இளைய உறவினர் பெண் அபிகைல் ஹில் பணிப்பெண் வேலைக்காக இங்கிலாந்து அரண்மனைக்கு பறாரி,பறக்காவட்டி போன்ற தோற்றத்தில் வருகிறாள்.
அபிகைலின் வறிய நிலைக்கு அவரது தந்தையே காரணம், whist என்ற ஒரு சூதாடும் சீட்டாட்டத்தில் அவர் மகளையே பணயமாக வைத்து சூதாடி தோற்றுவிட அவள் இங்கே பணிப்பெண்ணாக வரவேண்டியதாகிவிட்டது.
அரண்மனையில் விழும் பாத்திர பண்டங்களைத் தேய்க்கவும், அழுக்குத் துணிகளை துவைக்கவும் மூன்றாம் தர வேலைக்காரியாக அபிகைல் நியமிக்கப்படுகிறாள், அவளின் சகோதரி முறை கொண்ட சாரா அவளுக்கு உதவுவதே இல்லை.
மகாராணியின் Gout (கீல்வாதம்) ஐ அபிகைல் பார்த்தவள் , மகாராணியின் வீக்கமடைந்த கால்களுக்கு காட்டு மூலிகைகள் கொண்டு வலியை மட்டுப்படுத்தி குணமளிக்க முடியும் என அவளே துருதுருவென செயலில் இறங்கியவள், மூலிகை பொறுக்கி இடித்து மையாக அரைத்து மகாராணி வலியில் அனத்தியபடி தூங்குகையில் பத்து இடுகிறாள், வலி குறையவும் மகாராணி நன்கு தூங்குகிறாள்.
மறுநாள் காலையில் அபிகைல் அனுமதியின்றி ராணியின் படுக்கையறைக்குள் நுழைந்ததற்காக சாரா அபிகைலை முதுகில் சவுக்கால் விளாச அடிக்க ஆணையிடுகிறாள் , ஆனால் அவள் இட்ட மூலிகைப் பத்து மகாராணிக்கு உதவியதை உணர்ந்தபின் மயிரிழையில் தண்டனையில் இருந்து தப்புகிறாள் அபிகைல் , தனது அந்தப்புரத்தின் பிரதான பணிப்பெண்ணாக அபிகைலை நியமிக்கிறார் மகாராணி, அபிகைலின் திட்டம் வேறாக இருக்கிறது, அவளுக்குள் தன் குடும்பம் பட்ட அவமானத்திற்கு காரணமான உறவுகளை கருவறுக்கும் வஞ்சம் உச்சத்தில் இருக்கிறது, அவள் கச்சிதமாக காய் நகர்த்துகிறாள்.
ஒரு இரவு சாராவும் மகாராணியும் உடலுறவு கொள்வதை மறைந்திருந்து காண்கிறாள் அபிகைல்.
உயிர்த்தோழி சாராவின் ஏதேச்சாதிகாரத்தை பறித்து அவளை பதவி இறக்குவதற்கு அபிகைல் உதவுவாள் என்ற நம்பிக்கை அமைச்சர் ஹார்லிக்கு வர , ஹார்லி மகாராணி சாரா இருவரையும் உளவு பார்க்கும்படி அபிகைலிடம் கேட்கிறான், அதையும் அதிகாரமாகக் கேட்கிறான், அபிகைல் அவனிடம் முடியாது என்றவள்,பின்னர் சாராவிடம் வந்து ஹார்லி உளவு பார்க்க சொன்னது பற்றி கூறுகிறாள், இருவருடைய அந்தரங்க ரகசியம் எனக்குத் தெரியும் என்றும் அது என்றும் என்னுடன் பாதுகாப்பாக இருக்கும் என்கிறாள் , ஆனால் முகம் கருத்து இறுகிப் போன சாரா எனக்கு ஒருபோதும் துரோகம் செய்யக்கூடாது என்று ஒரு மறைமுகமாக எச்சரிக்கிறாள்.
அடுத்து வரும் நாட்களில் சாரா ஃப்ரான்ஸுக்கு எதிரான போரில் அவள் தளபதி கணவனுடன் சென்று படைக்களத்தில் உடன் தங்கியிருந்து போரில் கவனம் செலுத்துகிறாள்,
அபிகைல் இச்சூழ்நிலையைப் பயன்படுத்தி மகாராணியுடன் நட்பாகிறாள், சாராவின் முரட்டு அன்பிலிருந்து அபிகாயிலின் இதமான சேவகத்தில் கட்டுண்டு போகிறாள் மகாராணி.
அபிகைல் ராணியை கவர்ந்திழுத்துவிடுகறாள், அவளின் நடை உடை பாவனை எல்லாம் மாறுகிறது,மகாராணி அபிகைல் கவனிப்பால் ஆளே முற்றிலும் மாறியிருக்கிறார்,அபிகைல் மகாராணிக்கு காமரசக்கலையின் உச்சம் காட்டி படுக்கையில் மகிழ்விக்கிறாள், சொக்குப்பொடி போட்டது போல மகாராணி அழகிய புதுப்பெண்டாட்டியிடம் மயங்கிக் கிடக்கும் கணவன் போல மயங்கிக் கிடக்கிறாள்.
வயதில் பாதியே இருக்கும் அபிகைலுக்கு ஈடுதருவதற்கு தன் ஆரோக்கியத்தில் மிகுந்த கவனம் செலுத்துகிகிறார், இந்த மகாராணியின் முழு மாற்றத்தை போர்க்களத்தில் இருந்து திரும்பிய சாரா முதல் பார்வையிலேயே கண்டுபிடித்து விடுகிறாள், சாரா முகம் பொறாமையால் தகிக்கிறது, அபிகைலை அந்தப்புர தலைமைப் பெண் பதவியில் இருந்து நீக்க மிகுந்த பிரயத்தனப்படுகிறாள், ஆனால் அவள் முயற்சிகள் எதுவும் பலிப்பதில்லை.
அபிகைல் எதற்கும் துணிந்தவள் , நைச்சியமாக மகாராணியிடம் ஒரு பாட்டம் அழுது நாடகமாடுகிறாள், உங்கள் உடல்நலனே எனக்கு முக்கியம், என்னை வேலையை விட்டு துரத்தினாலும் உங்கள் சேவைக்கு வேண்டி எப்போதும் காத்திருப்பேன் என ச் சொல்லி ஆதரவையும் பரிதாபத்தையும் ஒருங்கே பெறுகிறாள் .
இப்போது மீண்டும் அந்தப்புர தலைமைப் பெண்மணியாக மட்டும் இராமல் எதிர்க்கட்சித் தலைவர் ஹார்லியின் உளவு பார்க்கிற வாய்ப்பை மறுபரிசீலனை செய்கிறாள் அபிகைல்.
அபிகைலை தேடி வந்த சாரா, மீண்டும் உன்னை பராரியாக வீதிகளில் வீசுவேன் என்று மிகுந்த ஆவேசத்தில் சாரா கடுமையாக அச்சுறுத்துகிறார்.
மகாராணியைப் பார்க்க அந்தப்புரம் வந்த சாரா அபிகைலிடம் தேநீர் கொண்டு வா என ஆணையிடுகிறாள்,
அந்த தேநீரில் போதை மருந்து கலக்கிறாள் அபிகைல் ,சுவையான தேநீரை விரும்பி அருந்துகிறாள் சாரா, மகாராணியிடம் மீண்டும் தர்க்கம் செய்து எந்த முடிவும் எட்டமுடியாததால் மிகுந்த கோபத்தில் குதிரையை சாட்டையால் அடித்து கிளப்பிக் கொண்டு வனத்திற்குள் போகிறாள் சாரா, பாதிவழியில் தலை சுற்றி கீழே விழுந்தவள் சேணக்கயிறு சுற்றியிருக்கவே மயக்கமடைந்தவள் தரையில் தரதரவென இழுத்துச் செல்லப்படுகிறாள்.
சாரா ஒரு மலினமான விபச்சார விடுதியில் வைத்து கண்விழிக்கிறாள், அவள் அழகு திமிர் எதுவும் இந்த விபச்சார விடுதி நடத்தும் முரட்டு மூடர்களிடம் எடுபடுவதில்லை, சாரா தன்னை மகாராணியின் உயர்த்தோழி என்று சொல்லியும் நம்ப ஆளில்லை, முரட்டுத்தனமான சாராவை விபச்சாரத்திற்கு பழக்கி நல்ல வெளியூரில் நல்ல விலைக்கு விற்க திட்டமிடுகின்றனர்.
இங்கு அரண்மனையில் உயிர்த்தோழி சாரா தன்னை கோபித்துக் கொண்டு கைகழுவிவிட்டுச் சென்றதாக நினைக்கிறார் மகாராணி அன்னி, இப்போது முழுமையாக அபிகைலை தன் உயிர்தோழியாக வரிக்கிறாள், அவளுக்கு ஆஸ்தி பாஸ்தி அந்தஸ்து வழங்க முடிவு செய்கிறாள்,
அபிகைலை கர்னல் மஷாமை திருமணம் செய்து கொள்ள முன்னின்று நிச்சயித்து விமரிசையாக அரசவைத் திருமணத்தை நடத்துகிறாள், இப்போது அபிகைல் ஒரு baroness,அவளுக்கு சாராவை வெறும்.பேற்றுவதற்கு இதை விட உயரிய அந்தஸ்து வேறிருக்க முடியாது,
ஃப்ரெஞ்சு போர் முடிவுக்கு வருவதற்கு ஹார்லியின் பங்களிப்பு பற்றி அபிகைல் மகாராணிக்கு பரிந்துரைத்து நற்பெயர் பெற்றுத் தருமளவிற்கு அபிகைல் செல்வாக்கு பெற்றிருக்கிறாள்.
சாராவைத் தேடத் துவங்கும் அரண்மனைக் காவலர்கள் அவளை அந்த மலினமான விபச்சார விடுதியில் இருந்து மீட்டுக் கொண்டு அரண்மனை திரும்புகின்றனர்,
அபிகைல் சாராவை சற்று அதிகமாக சீண்டியதை உணர்ந்து மன்னிப்பு கேட்கிறாள், ஆனால் தேநீரில் மயக்க மருந்து கலந்ததற்கும் விபசார விடுதியில் தான் கேவலப்பட்டதறகும், தன் கௌரவம் முற்றிலும் சிதைந்து போனதற்கும் சாரா அவளை அழிக்க திட்டம் தீட்டி காய் நகர்த்துகிறாள்.
சாரா மகாராணிக்கு ஒரு இறுதி எச்சரிக்கை கடிதம் அனுப்புகிறாள், யுத்தம் முடிவுக்கு வரக்கூடாது, தொடர வேண்டும் என்கிறாள், அபிகைலை உடனே நாட்டை விட்டு அனுப்பி விட வேண்டும் இதை செய்யாவிட்டால் மகாராணி அன்னிக்கும் தனக்கும் இருக்கும் பாலியல் தொடர்பை ஆதாரத்துடன் அம்பலப்படுத்தி அரசவையில் சந்தி சிரிக்க வைப்பேன் என்று எழுதியிருக்கிறாள் சாரா,
சாராவின் கடிதத்தால் மகாராணி மிகவும் புண்பட்டு போகிறாள்,அவள் மீது அத்தனை மையல் வைத்திருந்த தனக்கு இத்தனை பெரிய பேரதிர்ச்சியை சாரா தந்ததை தாங்கிக் கொள்ள முடியவில்லை, இக்கடிதத்திற்கு சாரா உடனே அந்தரங்கமாக மன்னிப்பு கேட்கவேண்டும் என்று பதில் கடிதம் எழுதுகிறாள்,
சாராவின் மன்னிப்பு கடிதத்திற்கு மகாராணி ஆவலுடன் காத்திருக்கிறார்.
இந்நிலையில் purvy purse keeper (மகாராணியின் கணக்காளர்) பதவி உயர்வு பெற்ற அபிகையில்,முன்பு மகாராணியின் கணக்காளராக இருந்த சாரா மற்றும் அவர் கணவருடன் இணைந்து பெரும் நிதியை மோசடி செய்ததற்கான ஆதாரம் தருகிறாள், ஆனால் மகாராணியால் சாரா இந்த பெரும்பணத்தை கையாடல் செய்திருப்பாள் என்கதை நம்பமுடியவில்லை.
சாரா மகாராணியின் கடிதம் கிடைக்கப்பெற்றதும் கிடைக்கப்போகும் தண்டனைகள் , எதிர்விளைவுகள் தெரிய வர பம்மியபடி எழுதிய மன்னிப்புக் கடிதம் அந்தப்புரத்திற்கு வருகிறது, ஆனால் அதை சாதுர்யமாக அபிகைல் அதை எரித்துவிடுகிறாள், சாரா தன்னிடம் மன்னிப்பு கேட்கவில்லை என்று கடும் வேதனை அடைந்த மகாராணி, சாரா மற்றும் அவரது படைத்தளபதி கணவரை இங்கிலாந்தில் இருந்து நாடுகடத்த ஆணையிடுகிறார்.
இப்போது தன் ஒன்றுவிட்ட சகோதரி சாரா மீதான நெடுநாள் வஞ்சத்தை அபிகைல் தீர்த்துக் கொண்டாள், பகையாளி சகோதரி சாராவை நாடுகடத்தியவள், ஓட்டாண்டியாக்கியிருக்கிறாள், அபிகைலின் நிலை அரண்மனையில் அசைக்கமுடியாததும் மிகுந்த பாதுகாப்பாகவும் இருப்பதை நாம் கண்ணுறுகிறோம்,
ஒரு நாள் விடியலில் அபிகைல் மகாராணியின் 17 முயல்களில் ஒன்றை சீண்டி துன்புறுத்தி மகாராணியை வெறுப்பேற்றுகிறாள்.
சாராவின் துரோகத்தால் மிகவும் நொந்து உடல்நிலை மோசமாகிறார் மகாராணி,
அன்று தன் செல்ல முயல் கூண்டுக்குள்ளிருந்து சப்தமிடவே, அபிகைல் அவற்றை என்ன செய்கிறார்? என்று பார்க்கிறார் மகாராணி,அவள் மகாராணியை சுத்தமாக மதிப்பதில்லை.
மகாராணி சிரமத்துடன் படுக்கையில் இருந்து எழுந்தவர் கோபத்துடன் அபிகைலை தன்முன்னால் மண்டியிட்டு தன் வலிக்கிற கால்களை மசாஜ் செய்யும்படி கட்டளையிடுகிறாள். அவள் மதிப்பதில்லை, பொறுமை இழந்த மகாராணி, அபிகைலின் தலைமுடியை இழுத்து, காலில் கிடத்த , அபிகைல் வலியைத் தாங்கிக் கொள்கிறாள், மகாராணியின் கால்களுக்கு வேண்டா வெறுப்பாக மசாஜ் செய்யத் துவங்குவதுடன் படம் நிறைகிறது.
இப்படம் பெரும்பாலும் இயற்கை வெளிச்சத்தில் சூரிய ஒளி அல்லது மெழுகுவர்த்திகள் மற்றும் fire place வெளிச்சத்தில் படமாக்கப்பட்டது, தவிர்க்க முடியாத சில. காட்சிகள் மட்டும் குறைந்த விளக்குகளுடன் படமாக்கப்பட்டது,ஆகவே அத்தனை தரமாக நிஜத்தன்மையுடன் இந்த period set அமைந்துள்ளது.
ஒளிப்பதிவாளர் Roby Ryan பிரத்யேகமாக patent pending கருவிகளை தனக்கென வைத்திருந்து படமாக்கியுள்ளார்,
இத்திரைப்படத்தில் நடிகர்கள் அனைவரும் மூன்று வாரங்கள் ஒன்றாக கூடி ஒவ்வொரு காட்சிக்குமர ஒத்திகை பார்த்தனராம். அவர்கள் பலவிதமாக காட்சிகளை நடித்து பார்த்து மேம்படுத்தியவர்கள், படப்பிடிப்பை ரசித்தும் விளையாட்டாகவும் நடத்தினராம் , நடன இயக்குனருடன் அப்படி ஒத்துழைத்துப் பணிபுரிந்தனர்,படத்தின் முயல் பந்தயம் வாத்துப் பந்தயக் காட்சிகளில் வருவது போலவே நடிகர்கள் ஒருவருக்கொருவர் முட்டாள்தனமாக தோற்றமளிக்க கட்டற்ற சுதந்திரம் வழங்கப்பட்டதாம்,
இப்படத்தை திரைப்பட ஆர்வலர்கள் மாணவர்கள் ஒளிப்பதிவாளர்கள் தவறவிடதீர்கள், இப்படத்தின் ஒளிப்பதிவில் நயமாக நளினமாக fish eye lens , quinted eye lens உபயோகித்து ஏராளமான காட்சிகள் அற்புதமாக படமாக்கபட்டுள்ளன, நம்பகமான கலையலங்காரம், உடையலங்காரம், அரங்கங்கள் அனைத்தும் அபாரமானவை, ஒரு period black comedy திரைப்படம் எப்படி சுவை மிகுந்ததாக இருக்க வேண்டும் என்பதன் உதாரணம் The Favorite , அமேஸான் ப்ரைமில் உள்ளது, வயது வந்தவர்களுக்கான திரைப்படம் இது.
இத்திரைப்படம் உலகெங்கிலும் திரைப்பட விழாக்களில் பெற்ற உயரிய விருதுகளுக்கு கணக்கே கிடையாது, இத்திரைப்படம் 274 உயரிய திரைப்பட விருதுகளுக்கு தேர்வு செய்யப்பட்டு 119 உயரிய விருதுகளை அள்ளி வந்தது, அதற்கெனவே தனி அட்டவணை இங்கு உள்ளது,
https://en.m.wikipedia.org/wiki/List_of_accolades_received_by_The_Favourite
#The_Favorite, #Olivia_Colman,#Emma_Stone,#Rachel_Weisz,#Tony_McNamara ,#Deborah_Davis,#Queen_Anne,#Yorgos_Lanthimos
