பைசா கோபுரத்தின் கரைந்த படிகள்

கரைப்பார் கரைத்தால் கல்லும் கரையும் என்பார்கள், சுற்றுலா பயணிகள் தான் இங்கே கரைப்பார், இத்தாலியின் உலக அதிசயம் பீஸா நகரின் சாய்ந்த கோபுரத்தின் மணிக்கூண்டின் 294 பளிங்கு படிகளும் இப்படி கரைந்து போய் தான் உள்ளது,4° பாகை சாய்வு மட்டுமே அதன் குறையல்ல, இது போல பல குறைகள் கொண்டது தான் பீஸா கோபுரம்.

சென்னையின் பெரும்பாக்கம் மலை என்ற சரித்திர சின்னம் பற்றி அறிவோம்

தென்கிழக்குச் சென்னையின் இந்த பெரும்பாக்கம் மலை வரலாற்று முக்கியத்துவம் வாய்ந்தது, உலகின் உயர்ந்த சிகரம் மவுண்ட் எவரஸ்ட் என்று மார்ச் 1856 ஆம் ஆண்டு கணிதமேதை மற்றும் நில அளவியலாளர் ராதாநாத் சிக்தர் ஆதாரபூர்வமாக நிறுவதற்கு இங்கு தான் பிள்ளையார் சுழி இடப்பட்டது.

The Great Trigonometrical Survey of India என்ற நில அளவீட்டுப் பணி 10 ஏப்ரல் 1802 ஆம் ஆண்டு துவங்கியது , மெட்ராஸ்  முதல் மங்களூர் வரை (கிழக்கு கடற்கரை முதல் மேற்கு கடற்கரை வரை ) நில அளவையை சர்.வில்லியம் லாம்டன் அவர்கள் மேற்பார்வையில் துவங்கினார்,  மெட்ராஸ் ஒதுக்குப்புறத்தில் இருந்த உச்சி தட்டையான மூன்று மலைக்குன்றுகளை முதல் முக்கோணம் வரைய வேண்டி theodalite வைக்க அவர் தேர்வு செய்தார், 

அவை இந்த 1.பரங்கிமலை (st.thomas mount ) 2.பெரும்பாக்கம் மலை 3.சின்னமலை (சைதாப்பேட்டை) ஆகும்.

இருபது வருடங்களுக்கு முன்பு இந்த புதுப்பாக்கம் மலை மேய்ச்சல் புறம்போக்கு நிலமாக இருந்தது,புதுப்பாக்கம் மலை உச்சியில் இருத்த bench mark நூறாண்டுகளில் சிதிலமடைந்து காணாமலே போய்விட்டது, 

சின்னமலை  சைதாப்பேட்டை குன்று என்பது அங்கு வசிப்பவர்களுக்கே தெரியாது, அங்கிருந்த benck mark கூட ஆக்கிரமிப்பாளர்களால் அருமை தெரியாமல் அகற்றப்பட்டது.

கடந்த பதினைந்து வருடங்களாக பெரும்பாக்கம் மலை அடிவாரம் முழுக்க பஞ்சாயத்து தலைவர் அனுமதி பெற்று மனைகள் உருவாகின, மலை எதிரே பொலினினி ஹில்ஸைட் என்ற மிகப்பெரிய குடியிருப்பு வளாகம் வந்தது, இப்படி இந்த வரலாற்று சிறப்பு கொண்ட புதுப்பாக்கம் மலையை சுற்றுப்போட்டு சுரண்ட, நகராட்சி தன் பங்குக்கு மிகப்பெரிய குப்பை கிடங்கை உருவாக்க வேலை பார்த்தது, வழக்கம் போல தாமதமாக விழித்துக் கொண்ட ASI archeological survey of india சமீபத்தில் இங்கே பாதுகாக்கப்பட்ட நிலம் என்ற அறிவிப்பு பலகையை ஊன்றிச் சென்றுள்ளது, 

சார்பதிவாளர் அலுவலகம் இனியேனும் இந்த பாதுகாக்கப்பட்ட சின்னத்தை சுற்றி 300 மீட்டர்(~1000 அடி) சுற்றளவுக்கு வீடுகள் கட்டிடங்கள் தெருக்கள் அமையாமல் தடுக்க வேண்டும்.

சர்.வில்லியம் லாம்டன் அவர்கள் அமைத்த bench mark பரங்கிமலை உச்சியில் மட்டுமே (st.thomas mount ) பாதுகாக்கப்பட்டு வருகிறது, வரலாறு என்றாலே வெறுக்கும் மக்கள், வரலாற்று சின்னங்களை தொடர்ந்து அழித்து பெயர்த்து ஆக்கிரமித்து தங்கள் பெயர் எழுதி ரசிக்கும் அவலம் தொடர்ந்து நடக்கிறது,

தில்லி பிரகதி மைதானில் இடிக்கப்பட்ட சுதந்திர இந்தியாவின் பெருமைமிகு மூன்று கட்டிடங்கள் பற்றி அறிவோம்

2023 மே மாதம் பிறந்தால் இந்தியாவின் பெருமை மிகுந்த நவீன கட்டிடக்கலையின் அம்சமான மூன்று 

கட்டிடங்கள் அதன் அருமை தெரியாமல் இடிக்கப்பட்ட நிகழ்வு நடந்து ஐந்து வருடங்களாகிறது,

புகழும் மக்கள் செல்வாக்கும் மிகுந்த  நல்ல குடிமகனை ஊரறிய தூக்கில் ஏற்றிக் கொன்றதற்கு ஒப்பான அவலத்தை இங்கு எழுகிறேன், இது செத்தவன் கையில் வெற்றிலை பாக்கு தருவது போன்றதே,ஆனாலும் இதை யாரேனும் அறியாதவர் அறியட்டும் என எழுதுகிறேன் .

பாரீஸுக்கு ஐஃபிள் டவர் எத்தனை பெருமையோ தில்லிக்கு இந்த பிரகதி மைதானின் இந்த மூன்று  பரீட்சார்த்த கட்டிடங்கள் அத்தனை முக்கியம், உலகின் மிகப் பெரிய brutalism பாணி காங்க்ரீட் முக்கோணச் சட்டக இழுவிசை உத்திரங்களைக் (space frame tensile structures ) கொண்ட கட்டிடங்கள் இவை.

1.Hall of Nations (சர்வதேச கண்காட்சி அரங்கு)

2.Nehru Pavilion (நேரு கண்காட்சியம் அரங்கு )

3.Hall of Industry (தொழில்துறை கண்காட்சி அரங்கு )

சுதந்திர இந்தியாவின் கால் நூற்றாண்டு பயணத்தை அகில உலகிற்கும்  அறிவிக்கும் வண்ணம் இந்த கட்டிட வளாகம் 3 நவம்பர் 1972 ஆம் ஆண்டு மக்கள் பயன்பாட்டுக்கு திறக்கப்பட்டது, இந்தியாவின் முக்கியமான கட்டிடக்கலைஞர் ராஜ் ரிவால் (raj rewal) அவர்கள் மற்றும் இந்தியாவின் முக்கியமான கட்டிட பொறியாளரான மகேந்திர ராஜ் ஆகிய இருவரின் நொலைநோக்கு பார்வையில் உருவான பிரம்மாண்டமான பரீட்சார்த்த முயற்சி இது, 

பெரிய கட்டுமானங்களில் பயன்படுத்தப்படும் எந்த நவீன உபகரணங்கள் இல்லாமல் கிடைத்தவற்றைக் கொண்டு இத்தனை பிரம்மாண்டம் வரவழைத்துக் கட்டப்பட்டது.

இளங்கன்று பயமறியாது என்பதற்கேற்ப இந்த பெருமைமிகு கட்டிட வளாகத்தை கட்டிடக்கலைஞர் ராஜ் ரிவால் அவர்கள் வடிவமைப்பு போட்டியில் வென்று வடிவமைத்து கட்டுமானம் செய்கையில் அவரின் வயது 36,செயற்கரிய சாதனையை செய்திருந்தார் அவர்.

தில்லியின் ஹூமாயூன் சதுக்கத்தில் இருந்து உந்துதல் பெற்று இந்த வடிவமைப்பு நிகழ்ந்தது, சமமற்ற ஆனால் சமச்சீரான எண்கோணத்தின் உச்சியில் அமைக்கப்பட்ட 3.4மீ விட்டம் கொண்ட நெடுவரிசைகள் போன்ற எண்கோண வெற்று வட்ட வடிவ தண்டின் மீது 22மீ உயரமும், தெளிவான இடைவெளியும் 44மீ. கொண்ட ஒரு மைய மண்டபமாக இது அமைந்திருந்தது.

இந்த அமைப்பு Cast-in-situ RCC ஸ்லாப் மற்றும் 50 செமீ விட்டம் கொண்ட 408 எண்ணிக்கையிலான  Cast-in-situ கான்கிரீட்  இழுவிசை கிராதிகள்மீது நிறுவப்பட்டது.

இக்கட்டுமானத்தில் ஏறத்தாழ 4,380 கன சதுர மீட்டர் காங்க்ரீட் பயன்படுத்தப்பட்டது, 750 மெட்ரிக் டன் வலுவூட்டப்பட்ட எஃகு கம்பிகள் பயன்படுத்தப்பட்டது, இன்று இது போல பரீட்சார்த்த கட்டிட வளாகம் கட்ட வேண்டும் என்றால் 3000 கோடி இந்திய  ரூபாய் திட்ட மதிப்பு வரும்.

உதாரணத்துக்கு சொன்னால் எளிமையின் அழகியல் பிரம்மாண்டத்தை பறைசாற்றிய கட்டிட வளாகம், பூச்சு வேலை அற்ற இழுவிசை கிராதிகள் ,ஆனால் 45° பாகைக்கு shuttering செய்ததில் அத்தனை துல்லியம், precast என்ற ready made தொழிற்நுட்பம் இன்றி கைகளால் கலவை கலந்து , பாகை திருத்தி கொரடு கொண்டு வரைபடங்களுக்கேற்ப  கம்பி வளைத்து சாரம் மரப்பலகங்கள் அடித்து வார்த்து காங்க்ரீட் கலந்து நிரவி 18 மாதங்களில் கட்டப்பட்டது, எப்படி எகிப்து  பிரமிடின் துல்லியம் தொலைவில் போகப்போக தெரியுமோ? அப்படி இந்த கைத்தறி பாணி பிரம்மாண்ட கட்டிடத்தின் நேர்கோடுகளை 0°, 45° துல்லியத்தை நேர்த்தியை, தொலைவில் போகப்போக ஒருவர் உணரலாம், அருகில் நெருங்கிப் பார்க்க சொரசொரவென காதி உடையில் தறிப்பிசிறுகள் போல மரப்பலகம் அடித்து வார்த்த தோற்றநயத்தை (texture) காணலாம்,

உள்ளது உள்ளபடி அழகு என்ற உயரிய ரசனை கோட்பாடின் படி உருவான ஒப்பற்ற கட்டிட வளாகம், அதன் மேன்மை, ரசனையை அறியாதவர்களால் குற்றம் சாட்டப்பட்டு தரைமட்டமானது துயர வரலாறு.

நேருவின் அருங்காட்சியம் ஒரு மக்கள் தலைவரின் அருங்காட்சியம் எப்படி இருக்க வேண்டும் என்பதற்கிணங்க வடிவமைப்பட்டது, 

ஆட்சி மாறுகையில் காட்சி மாறும் என்பதற்கிணங்க மே 2014 மத்தியில் ஆட்சி மாறியதும்  நெடுநாள் நிலுவையில் இருந்த  நீதிமன்ற தீர்ப்பு கட்டிடக்கலை ஆர்வலர்களுக்கு  எதிராக பேரிடியாக வந்தது, மேல் முறையீட்டுக்கு இடமின்றி ஒரு வார காலத்தில் இடித்து அழிக்கப்பட்டது.

சண்டிகருக்கு அடுத்து காங்க்ரீட்டில் பிரம்மாண்டமான பரீட்சார்த்தங்கள் செய்து புணைந்த முயற்சி, இந்த பிரம்மாண்டத்தை உணர இந்த கண்காட்சி வளாகத்தின் நிலத்தின் பரப்பளவை ஒருவர் அறிந்தால் போதும் ,150 ஏக்கர் (~ 625,000 சதுர மீட்டர்) காங்க்ரீட் கூரை போர்த்திய பரப்பளவு 9500 சதுர மீட்டர்(102200 சதுர அடி).

சமகால கட்டிடக்கலையின் அதிசயம் கட்டிடக்கலை படிக்கும் மாணவர்கள் தவறாமல் தங்கள் ஐந்து வருட கல்விக்காலத்தில்  அகில இந்திய சுற்றுலாவின் போது சென்று வந்த முக்கியமான கட்டிடம்,கட்டிடக்கலை பயிலும் கடைசி   ஐந்து வருட மாணவர்கள் மட்டும் தடவிப்பார்த்து கண்டுகளிக்காமல் போன சமகால நவீன கட்டிடக்கலையின் அதிசயம்.

இணைப்பில் படங்கள் ஒவ்வொன்றாக பார்த்து இந்த அருமை புரிந்து கொள்ளாமல் இடிக்கப்பட்ட பெருமைமிகு கட்டிட வளாகத்துக்கு அஞ்சலி செலுத்துமாறு வேண்டுகிறேன்.

சண்டிகர் சட்டசபை நுழைவாயில் கதவு

இன்று கட்டிடக்கலையில் AI என்ற Architectural Intelligence புகுத்தி நினைத்துப் பார்க்கவே தயங்கும் வடிவமைப்புகளை செய்கிறோம், அத்தகைய பிரம்மாண்டங்களை 60 ஆண்டுகளுக்கு முன்பே சுதந்திர இந்தியாவில் செய்தனர்.

சண்டிகர் முழுக்க பரீட்சார்த்தம் , அதுவும் துணிவு மிக்க பரீட்சார்த்த பாணி கட்டிடக்கலையை ஃப்ரெஞ்சு கட்டிடக்கலைஞரும் நகரவடிவமைப்பாளருமான 

Le corbusier மற்றும் Pierre Jeanneret இணைந்து இழைத்து இழைத்து வடிவமைத்தனர், இந்தியாவின் முதல் பிரதமர் நேரு அவர்களின் பஞ்ச சீலக் கொள்கையை உள்வாங்கி அதன் அம்சங்களை பிரதிபலித்தனர்.

இந்த சட்டசபை கட்டிடம் 2016 இல் யுனெஸ்கோவின் உலக பாரம்பரிய தளமாக அறிவிக்கப்பட்டுள்ளது, எனவே இதை அருமை தெரியாமல் இடித்து தள்ளுவது என்பது கனவிலும் நடக்காது.

இந்த சட்டசபை நவீன இந்திய கட்டிடக்கலையின் பெருமை எனலாம், சட்டசபை நீளம் அகலம் உயரம் என அனைத்தும் அதி பிரம்மாண்டத்தை பறைசாற்றுகிறது, சட்டசபை கூடாத நாட்கள் முழுக்க கட்டிடக்கலை பயிலும் மாணவர்கள் கல்வி சுற்றுலா வந்து ஆராயும் இடமாக உள்ளது.

சட்டசபை unfinished creative work அல்லது brutalism பாணியில் RCC கொண்டு cast in situ பாணியில் ஆர அமர ரசித்து உருவாக்கப்பட்டன, புருவமுயர்த்தும் விகிதாசாரம் கொண்டவை, காங்க்ரீட் மேலே ஆங்காங்கே உபயோகித்த வண்ணங்கள் அதிரவைப்பவை.

இந்த சட்டசபையின் கதவு pivot door, நடுநிலையான மேலும் கீழுமான  கீல்களில் பலநூறு கிலோ எடையை தாங்கி நிற்கிறது என்றால் நம்ப முடியாது.

சட்டசபை கோட்டை வாயிலின் பிரதான பிரம்மாண்ட நுழைவாயிலின் கைப்பிடி துவங்கி ஒவ்வொன்றையும் தனித்துவமாக மிகச்சிறப்பாக Le Corbusier வடிவமைத்தார், இந்தியாவில் அவர் தங்கி இருக்கையில்  கவனித்த விஷயங்களை தொகுத்து கதவில் இரு புறங்களிலும் வரைந்தார், நுழைவு வாயிலின் மேல் பாதி சூரியனின் திசையையும் இயக்கத்தையும் சித்தரிக்கிறது.

இந்த பிரம்மாண்டமான கதவு 8 மீட்டர் (26 அடி ) நீளம் , 8 மீட்டர் உயரம் , 0.3 மீட்டர் (1அடி )அகலம் கொண்டது, பரப்பளவில் 64 சதுர மீட்டர் (688 சதுர அடி ) கொண்டது, ஒரு 2BHK அடுக்ககத்தின் பரப்பளவு),இந்த 55 பலகங்கள் ஒவ்வொன்றும் பிரத்யேகமாக ஃப்ரான்ஸில் உள்ள Le corbusier ஸ்டுடியோவில் பிரம்மாண்டமான ஓவியமாக தீட்டப்பட்டு  இங்கு  விமானத்தில் கொண்டு வந்து ஒருசேரப்பிணைக்கப்பட்டு பொருத்தப்பட்டுள்ளது, 

ஒரு இந்தியாவின் புதிய மாநிலத்துக்கு  ஐரோப்பிய வடிவமைப்பாளரை அமர்த்தி  அவருக்கு முழு கலை சுதந்திரம் நம் முன்னாள் பிரதமர் நேரு அவர்களால் தரப்பட்டது, பிரம்மாண்ட கோட்டை கோட்டை வாசல் கதவை சட்டசபை வடிவமைப்புக்கு கட்டியம் கூறும் வண்ணம் அதிநவீனமாக வடிவைத்து நிர்மாணித்தார் 

Le corbusier அவர்கள்.

இக்கதவு துடிப்பான வண்ணங்களால் காண்போர் வியப்பூட்டும் படி உருவாகியுள்ளது, கதவு மேல் மற்றும் கீழ் பகுதிகளாக அழகாக பிரிக்கப்பட்டுள்ளது.  

மேல் பாதியானது இந்த பிரபஞ்சத்துடனான மனிதனின் உறவை சித்தரிக்கிறது , 

சூரிய பயணத்தின் வருட சங்கராந்தி, சந்திர கிரகணங்கள் ஆகியவற்றைக் குறிக்கும் ஓவியங்கள் மேலடுக்கில் காணலாம்.  கீழ் அடுக்கில்  விலங்குகள் ,  இயற்கை வடிவங்கள் உள்ளன.  ஒரு பாலைவனத்தின் சூழல்,  பசுமைசோலையின் சூழல், நதி, மரங்கள், காளைகள் மற்றும் ஆமையை சித்தரிக்கிறது, மேலும் கதவின் மையத்தில் உள்ள போதி மரம் ஞானக்கனிகளைத் தருகிறதாக கதவை வடிவமைத்திருந்தார் Le corbusier அவர்கள்,

60 வருடங்களை நெருங்கும் பிரம்மாண்டம், இன்னும் காண்போருக்கு , வியக்கவும் கற்கவும்,  விஷயம் பொதித்து வைத்து இருக்கும் பிரம்மாண்டம் சண்டிகரின் நகர அமைப்பு, அதன் சட்டசபை, அதன் அரசு கட்டிடங்கள் என ஒவ்வொன்றும்.

அண்ணாநகர் விஸ்வேஸ்வரையா டவர் வடிவமைத்த யஹ்யா மெர்சண்ட் மற்றும் நாடோடிக்காற்று திரைப்படம்

அமீரகத்தில வேலை பார்க்கையில் வேலைமீது ஓவர் பில்டப் தரும் நபர்களை மலையாளிகள் பாவனாயி என்று கிண்டல் செய்வதை கவனித்துள்ளேன்,தமிழில்

 "கதாநாயகன்" பார்த்தவர்கள் ஒருமுறை மூல வடிவமான நாடோடிக்காற்று (1987) பாருங்கள்,ஒரு க்ளாஸிக் என்பதன் அர்த்தம் அறியலாம் .

நாடோடிக்காற்றில் சிரிப்பு ஓவர்பில்டப் வில்லன் பாவனாயி  கதாபாத்திரம் உலகெங்கும் மலையாளிகளிடம் அப்படி புகழ்பெற்றது, 

அது போலவே சிரிப்பு ஃப்ராடு கஃபூர் இக்கா (மாமுக்கோயா) கதாபாத்திரம் உலகெங்கும் மலையாளிகளிடம் அப்படி புகழ்பெற்றது.

கள்ளத்தோணியில் கொச்சினில் இருந்து துபாயில் செல்ல முயன்று மெட்ராஸில் இறக்கிவிடப்பட்ட மோகன்லாலும் சீனிவாசனும் வில்லன் திலகனின் கடத்தல் தொழிலுக்கு தங்களையும் அறியாமல் அத்தனை குழப்பமும் நஷ்டமும் விளைவிப்பர், அந்த இரு வேலையில்லா பட்டதாரிகளை கொல்ல பம்பாயின் புகழ்பெற்ற பெய்ட் கில்லரான பாவனாயியை (இயற்பெயர் பி.வி.நாராயணன் ) (கேப்டன்ராஜ்) பெரும்பணம் தந்து தருவிப்பார் திலகன், பாவனாயி பெட்டியில் வில் அம்பு, மலபார் கத்தி, RDX பாம்ப், டேப்ரிக்கார்டர் பாம்ப், துப்பாக்கி என அனைத்தும் profesional ஆக வைத்திருப்பார், இவரும் திலகனும் கொலைசதிக்கு திட்டம் தீட்டுகையில் சிரிப்பு சரவெடியாக இருக்கும்.

மோகன்லால் காய்கறி விற்கும் தள்ளு வண்டியில் RDX பாம்ப் வைப்பார் பாவனாயி, அதில் தப்புவார் மோகன்லால்.

இரண்டு நாள் தான் கான்ட்ராக்ட் தந்த  அபாயின்மெண்ட் என்பதால் அடுத்து சீனிவாசனை கொல்ல விழைவார் பாவனாயி ,இசை அமைப்பாளர் சங்கர் கணேஷுக்கு ஒருவர்  டேப்ரிக்கார்டரில் குண்டு வைத்து தபாலில்  அனுப்பி அவர் இயக்கியதும் வெடித்ததே அதே டெக்னிக்கில் சதி செய்வர் , இங்கே சாலையில் அனாதையாக இருந்த டேப்ரிக்கார்டரை பார்த்ததும் அதை ஆன் செய்யாமல் கொண்டு போய் அடகு வைக்க மார்வாடி கடைக்கு செல்வார் சீனிவாசன், பாவனாயிக்கு மார்வாடி கடையில் வெடித்தால் விபரீதம் என்பதால் கடைவாசலில் வைத்து தன் கையாளை வைத்து பெரும் பணம் தந்து டேப்ரிக்கார்டரை திரும்ப வாங்கி வருவார்.

இறுதியாக இருவரை சர்கிள் இன்ஸ்பெக்டர் அழைத்ததாக ஆள்விட்டு அண்ணாநகர் விஸ்வேஸ்வரையா டவருக்கு வரசொல்லி, பெட்டியை திறந்து காட்டியவர் எப்படி சாக ஆசைப்படுகிறீர்கள் என்பார், 

அங்கே 12 ஆவது மாடியில் சண்டை நடக்கையில் இவர்கள் மீது பாய்கிறேன் என்று கைப்பிடி கம்பியில் பாய்கையில் குறிதவறி தரையில் விழுந்து இறப்பார் பாவனாயி .

1987 ஆம் ஆண்டு அண்ணாநகர் விஸ்வேஸ்வரையா டவரின் படங்களைப் பாருங்கள், அந்த கல்வெட்டு மீது கூட நம் ஆட்கள் எப்படி கைவரிசை காட்டி உள்ளனர் பாருங்கள், இந்த கோபுரத்தை வடிவமைப்பதற்கு முன் அகில இந்திய அளவில் வடிவமைப்பு போட்டி நடத்தப்பட்டது, அதில் வென்றவர் இந்தியாவின் பழம்பெரும் கட்டிடக்கலைஞரான காலஞ்சென்ற திரு. யஹ்யா மெர்சண்ட் (Yahya Merchant) (1903-1990)ஆவார், மும்பையின் சர்JJ காலேஜ் ஆஃப் ஆர்கிடெக்சர் என்ற பெருமைமிகு கல்லூரியில் பயின்றவர். அவரது பெருமைமிகு தனித்துவமான படைப்புகள்,  பொதுகட்டிடங்கள்  இந்தியா மற்றும் பாகிஸ்தான் நாடுகளில் நவீன இந்திய கட்டிடக்கலைக்கு பெருமை சேர்ப்பவை, 

இந்த விஸ்வேஸ்வரையா கோபுர வடிவம், துபாயின் புர்ஜ் அல் அராப் கட்டிட வடிவத்தின் முன்னோடி எனலாம், காரணம் புர்ஜ் அல் அராப் கட்டிடத்தின் படத்தை முதலில் 2000 ஆம் ஆண்டு ஒரு காலண்டரில் பார்க்கையில் நம் விஸ்வேஸ்வரையா டவர் தான் நினைவுக்கு வந்தது, வளைவான structural spines நிறுவி  மொத்த தளங்களை தாங்கிப்பிடிப்பது இரண்டு கட்டிடங்களும் கொண்ட ஒற்றுமை, anna nagar tower ல் ஐந்து  structural spine இருக்கிறது , burj al arab ல் நான்கு  structural spine இருக்கிறது . Quaid-e-Azam Mausoleum நினைவுச் சின்னத்தை வடிவமைத்தவர் யஹ்யா மெர்சண்ட்.

1968 ஆம் ஆண்டு மக்கள் உபயோகத்துக்கு 60 லட்சம் ரூபாய் செலவில் திறக்கப்பட்ட தொலைநோக்கான கட்டிடக்கலையைக் கொண்ட நூறடி உயர கோபுரம், எப்படி சுவற்றில் பெயர்களை எழுதி கிறுக்கி வைத்திருக்கின்றனர் பாருங்கள் நம் மக்கள், கல்வெட்டில் ஆர்கிடெக்ட் பெயரைக் கூட அவரின் மேன்மை அறியாமல் மார்க்கரால் மெழுகி தன்பெயரை எழுதி வைத்திருந்தனர் என்று இணைப்பு படம் ஒவ்வொன்றாக பாருங்கள், நான் முதலில் 1998 ஆம் ஆண்டு செல்கையில் இன்னும் கோரமான வசைகள் சுவர்களில்  எழுதி இருந்தது, இன்று பனிரெண்டு ஆண்டுகளுக்குப் பின்னர் முழுக்க கிரில்களால் மூடி சுவர்களில் கலை வேலைபாடுகள் செய்து புதிய தரை வேய்ந்து சுமார் 30 லட்சம் ரூபாய் செலவில் மீண்டும் திறந்துள்ளனர், இனியாவது மக்கள் கிறுக்க கொண்டுவரும் கரிக்கட்டிகள் பென்சில்கள் கைப்பற்றப்பட வேண்டும்.இனி ஒரு மாமாங்கம் இந்த கோபுரத்தை பூட்டி வைக்கும் அவலம் நேர வேண்டாம்.