2021 ஆம் ஆண்டு வெளியான "ஜூடாஸ் அண்ட் தி பிளாக் மெஸையா" திரைப்படம் உலக சினிமா வரலாற்றில் மிகச்சிறந்த வரலாற்றுச் சுவடாக போற்றப்படுகிறது.
அமெரிக்காவின் சிகாகோ நகரில் 1960 களின் இறுதியில் வாழ்ந்த பிளாக் பான்தர் கட்சியின் தலைவர் ஃப்ரெட் ஹாம்டன் என்பவரின் வாழ்வையும் அவர் சந்தித்த துரோகத்தையும் இந்தப் படம் மிகவும் ஆழமாகப் பதிவு செய்துள்ளது.
ஒரு வரலாற்றுச் சம்பவத்தை வெறும் தகவலாக மட்டும் தராமல் அதனை ஒரு கிரைம் த்ரில்லர் பாணியில் விறுவிறுப்பாகக் கையாண்ட விதம் உலக அளவில் பாராட்டுகளைப் பெற்றது.
இத்திரைப்படம் ஒரு புரட்சியாளனின் எழுச்சியை விடவும் அவனைச் சுற்றி பின்னப்பட்ட சதிவலைகளை மிக நுணுக்கமாக விவரிக்கிறது.
அதிகார வர்க்கம் தனது இருப்பைத் தக்கவைக்க எத்தகைய கீழ்த்தரமான உத்திகளைக் கையாளும் என்பதையும் ஒரு மனிதன் தனது சுயநலத்திற்காகத் தனக்கு நெருக்கமானவர்களையே எப்படிக் காட்டிக்கொடுப்பான் என்பதையும் இது ஆணித்தரமாகச் சொல்கிறது.
குறிப்பாக வில்லியம் ஓ நீல் எனும் உளவாளியின் பார்வையில் கதை நகர்வது பார்வையாளர்களுக்கு ஒரு புதுவிதமான அனுபவத்தையும் தார்மீகக் கேள்விகளையும் எழுப்புகிறது.
இந்தத் திரைப்படம் ஒரு தனிமனிதனின் சித்தாந்தம் எவ்வாறு ஒரு பேரரசின் அதிகாரத்தையே நடுங்கச் செய்கிறது என்பதையும் அந்த நடுக்கத்தைத் தணிக்க அரசு எத்தகைய தார்மீகமற்ற வழிகளைத் தேர்ந்தெடுக்கிறது என்பதையும் ஆழமாகப் பேசுகிறது.
ஒருபுறம் வறுமையிலும் ஒடுக்குமுறையிலும் உழலும் மக்களை ஒன்றிணைக்கும் மேசியாவாக ஃப்ரெட் ஹாம்டன் திகழ மறுபுறம் பிழைப்புக்காகவும் பயத்திற்காகவும் தன் இனத்தையே காட்டிக்கொடுக்கும் யூதாஸாக வில்லியம் ஓ நீல் வலம் வருகிறான்.
இந்த இரு துருவங்களுக்கு இடையே நடக்கும் உளவியல் போர் மற்றும் அற வீழ்ச்சியே இப்படத்தின் அடிநாதம்.
அதிகாரம் என்பது ஆயுதங்களால் ஆனது மட்டுமல்ல அது பிளவுகளை உருவாக்குவதிலும் வல்லது என்பதை இப்படம் தோலுரித்துக் காட்டுகிறது.
கறுப்பின மக்களின் ஒற்றுமையைக் கண்டு அஞ்சும் எப் பி ஐ அவர்கள் நடுவே ஒரு உளவாளியைச் செருகி அந்த நம்பிக்கையைச் சிதைக்க முயல்கிறது.
ஒரு சாதாரண திருடனைத் தேசத் துரோகியாக மாற்றும் அதிகாரம் அவனை ஒரு கருவியாக மட்டுமே பயன்படுத்துகிறது.
ஓ நீல் போன்றவர்கள் வெறும் பகடைக்காய்கள் மட்டுமே என்பதையும் ஆட்டம் முடிந்ததும் அவர்கள் தூக்கியெறியப்படுவார்கள் என்பதையும் வரலாறு மீண்டும் ஒருமுறை இப்படத்தின் மூலம் நினைவூட்டுகிறது.
சமூக மாற்றத்திற்காகத் தன்னுயிரைத் துச்சமெனக் கருதும் ஒரு போராளியின் தியாகத்திற்கும் தன் உயிரைக் காத்துக்கொள்ள சக மனிதனைக் காவு கொடுக்கும் ஒருவனின் கோழைத்தனத்திற்கும் இடையிலான இடைவெளி மிக மெல்லியது.
அந்த இடைவெளியில் அதிகார வர்க்கம் புகுந்து விளையாடும்போது தர்மம் எப்படி நிலைகுலைகிறது என்பதை இந்தப் படம் மிக நுட்பமாக விவரிக்கிறது. முடிவில் ஒரு புரட்சியாளனின் உடல் அழிக்கப்படலாம் ஆனால் அவன் விதைத்த அந்த ஒற்றுமை உணர்வும் அதிகாரத்தின் மீதான கேள்விகளும் சாகாவரம் பெற்றவை என்பதைச் சொல்லாமல் சொல்வதே இப்படத்தின் ஆன்மா.
இயக்குநர் ஷாகா கிங் இந்தப் படத்தை வெறும் ஒரு வாழ்க்கை வரலாற்றுப் படமாக மட்டும் சுருக்காமல் ஒரு அழுத்தமான அரசியல் சாசனமாகவே மாற்றியுள்ளார்.
வில் பெர்சன் மற்றும் கென்னி லூகாஸ் ஆகியோருடன் இணைந்து அவர் உருவாக்கிய திரைக்கதை ஒவ்வொரு காட்சியிலும் பதற்றத்தையும் உணர்ச்சியையும் சமமாகத் தக்கவைக்கிறது.
அடக்குமுறைக்கு எதிரான போராட்டத்தையும் அதே வேளையில் தனிமனித பலவீனங்களையும் அவர் கையாண்ட விதம் அவரது இயக்கத்தின் மேதமையைக் காட்டுகிறது.
திரைப்படத்தின் ஒளிப்பதிவு மற்றும் படத்தொகுப்பு ஆகியவை கதைக்கு உயிர் கொடுக்கின்றன.
சீன் பாபிட்டின் ஒளிப்பதிவு அறுபதுகளின் சிகாகோ நகரை அப்படியே கண்முன் நிறுத்துகிறது.
இருண்ட , அழுத்தமான வண்ணங்கள் படத்தின் தீவிரத்தன்மையை உணர்த்துகின்றன. கிறிஸ்டன் ஸ்ப்ராக் என்பவரின் கச்சிதமான படத்தொகுப்பு கதையின் வேகத்தைக் குறைக்காமல் பார்வையாளர்களைக் கதையோடு ஒன்றச் செய்கிறது.
126 நிமிடங்கள் ஓடும் இந்தப் படம் ஒரு நொடி கூட தொய்வின்றி நகர்கிறது.
கொரோனா பெருந்தொற்று காலமான 2021 பிப்ரவரி மாதம் சன்டான்ஸ் திரைப்பட விழாவில் இந்தப் படம் முதன்முதலாகத் திரையிடப்பட்டது.
பின்னர் வார்னர் பிரதர்ஸ் பிக்சர்ஸ் நிறுவனம் இதனைத் திரையரங்குகளிலும் எச்பிஓ மேக்ஸ் ஓடிடி தளத்திலும் ஒரே நேரத்தில் வெளியிட்டது.
சுமார் 26 மில்லியன் டாலர் பட்ஜெட்டில் உருவான இந்தப் படம் உலக அளவில் 7.5 மில்லியன் டாலர் வசூலித்தது. வசூலை விடவும் விமர்சன ரீதியாக இப்படம் பெற்ற வெற்றி மிகப்பெரியது.
நடிகர்களின் பங்களிப்பு இந்தப் படத்தின் மிக முக்கியமான பலமாகும். ஃப்ரெட் ஹாம்டனாக நடித்த டேனியல் கலுயா தனது ஆவேசமான பேச்சின் மூலமும் உடல்மொழியின் மூலமும் அந்தப் பாத்திரத்திற்குப் பெருமை சேர்த்துள்ளார்.
உளவாளியாக நடித்த லகீத் ஸ்டான்ஃபீல்ட் தனது முகபாவனைகளில் பயத்தையும் குற்ற உணர்ச்சியையும் மிகச்சரியாக வெளிப்படுத்தியுள்ளார்.
ஜெஸ்ஸி பிளெமன்ஸ் மற்றும் டொமினிக் பிஷ் பேக் ஆகியோரின் நடிப்பும் படத்தின் தரத்தை உயர்த்தியுள்ளன.
இசை இந்தப் படத்திற்கு ஒரு ஆன்மாவாகச் செயல்படுகிறது. மார்க் இஷாம் மற்றும் கிரேக் ஹாரிஸ் ஆகியோரின் பின்னணி இசை படத்தின் ஒவ்வொரு காட்சியிலும் நிலவும் அமைதியையும் வன்முறையையும் அழுத்தமாகக் கடத்துகிறது.
குறிப்பாக இப்படத்திற்காக எச்.இ.ஆர் பாடிய ஃபைட் ஃபார் யூ எனும் பாடல் மிகப்பெரிய வரவேற்பைப் பெற்றது.
படத்தின் தீவிரத்தன்மைக்கு ஏற்ப இசைக்கோர்வைகள் மிகக் கவனமாகத் தேர்ந்தெடுக்கப்பட்டுள்ளன.
விருதுகள் ரீதியாக இந்தப் படம் மிகப்பெரிய சாதனைகளைச் செய்தது. 93 வது அகாடமி விருதுகளில் சிறந்த படம் உட்பட ஆறு பிரிவுகளில் பரிந்துரைக்கப்பட்டது.
இதில் டேனியல் கலுயா சிறந்த துணை நடிகருக்கான ஆஸ்கார் விருதை வென்றார். மேலும் சிறந்த அசல் பாடலுக்கான ஆஸ்கார் விருதையும் இப்படம் தட்டிச் சென்றது.
கோல்டன் குளோப் மற்றும் பாஃப்டா போன்ற சர்வதேச விருது விழாக்களிலும் இந்தப் படம் தனது முத்திரையைப் பதித்து சிறந்த படங்களுக்கான பட்டியலில் இடம் பிடித்தது.
இத்திரைப்படத்தின் படப்பிடிப்பு வெறும் 42 நாட்களில் மின்னல் வேகத்தில் படமாக்கி முடிக்கப்பட்டது. படத்தின் முதன்மை நடிகர்களான டேனியல் கலுயா மற்றும் லகீத் ஸ்டான்ஃபீல்ட் ஆகிய இருவரும் இதற்கு முன்னரே 2017 ஆம் ஆண்டு வெளியான கெட் அவுட் திரைப்படத்தில் இணைந்து நடித்திருந்தனர் என்பது குறிப்பிடத்தக்கது.
இப்படத்தின் தலைப்பு முதலில் ஜீசஸ் வாஸ் மை ஹோம் பாய் என்று வைக்கப்பட்டு பின்னரே தற்போதைய தலைப்பிற்கு மாற்றப்பட்டது.
இயக்குநர் ஷாகா கிங் இந்தப் படத்தின் கதையை ஏ24 மற்றும் நெட்ஃபிக்ஸ் ஆகிய நிறுவனங்களிடம் விவரிக்கும்போது இது தி கன்ஃபார்மிஸ்ட் மற்றும் தி டிபார்ட்டட் ஆகிய படங்களின் கலவையாக இருக்கும் என்று கூறி கவனம் ஈர்த்தார்.
இப்படத்தின் தயாரிப்பாளரான ரையான் கூக்லர் பிளாக் பான்தர் எனும் மார்வெல் சூப்பர் ஹீரோ படத்தை இயக்கியவர் என்பது ஒரு சுவாரசியமான ஒற்றுமை.
படத்தின் உண்மையான வரலாற்றுத் தன்மையை உறுதி செய்ய ஃப்ரெட் ஹாம்டனின் மனைவி அகுவா நெய்ரி மற்றும் அவரது மகன் ஆகியோரின் ஒப்புதலைப் பெற்ற பின்னரே படப்பிடிப்பு தொடங்கப்பட்டது.
ஓஹியோ மாநில சீர்திருத்தச் சிறையில் இந்தப் படத்தின் சில முக்கியமான காட்சிகள் படமாக்கப்பட்டன.
படத்தின் பின்னணி இசைக்கோர்ப்பில் ஜே-இசட் மற்றும் நாஸ் போன்ற புகழ்பெற்ற ராப் இசைக்கலைஞர்களின் பங்களிப்பு இருந்தது.
ஆஸ்கார் விருது வரலாற்றில் ஒரே படத்தில் நடித்த இரு நடிகர்கள் அதாவது டேனியல் கலுயா மற்றும் லகீத் ஸ்டான்ஃபீல்ட் ஆகிய இருவரும் சிறந்த துணை நடிகர் பிரிவிலேயே பரிந்துரைக்கப்பட்டது பலரையும் ஆச்சரியத்தில் ஆழ்த்திய ஒரு அரிய நிகழ்வாகும்.
இப்படத்தின் திரைக்கதை உருவாக்கத்தில் வில் பெர்சன் 2014 ஆம் ஆண்டிலிருந்தே தனியாக ஒரு முயற்சியை எடுத்து வந்தார். தொடக்கத்தில் எஃப் கேரி கிரே போன்ற இயக்குநர்கள் இதனை இயக்க ஆர்வம் காட்டினர்.
அதே சமயம் ஜேடன் ஸ்மித் மற்றும் ஓஷியா ஜாக்சன் ஜூனியர் ஆகியோர் ஃப்ரெட் ஹாம்டன் பாத்திரத்தில் நடிக்க பரிசீலிக்கப்பட்டனர்.
பின்னர் ஷாகா கிங் மற்றும் லூகாஸ் சகோதரர்கள் இணைந்த பிறகே தற்போதைய வடிவம் பெற்றது.
படத்தின் தயாரிப்புச் செலவில் பாதியான 13 மில்லியன் டாலர்களை மேக்ரோ நிறுவனத்தின் சார்லஸ் கிங் நேரடியாக வழங்கினார்.
இது ஸ்டுடியோக்களின் தலையீடு இன்றி இயக்குநரின் கற்பனைத் திறனை முழுமையாக வெளிப்படுத்த உதவியது.
படத்தின் எடிட்டிங் பணிகள் 2020 ஜனவரியில் தொடங்கின. அப்போது பரவிய பெருந்தொற்று காரணமாக படக்குழுவினர் அனைவரும் நியூயார்க்கில் இருந்து தொலைதூரத்தில் இருந்தபடியே கோப்புகளைப் பகிர்ந்து இந்தப் பணியை முடித்தனர்.
இசைத் தட்டில் நிப்சி ஹசில் எனும் மறைந்த ராப் பாடகரின் குரல் மரணத்திற்குப் பின் சேர்க்கப்பட்டது ஒரு உணர்ச்சிகரமான விஷயமாகப் பார்க்கப்பட்டது.
இப்படத்தின் வெற்றியால் பில்போர்டு இசைப் பட்டியலில் சவுண்ட் ட்ராக் பிரிவில் இது முதலிடத்தைப் பிடித்தது.
இப்படத்தின் தலைப்பு உறுதி செய்யப்படுவதற்கு முன்னால் குறிப்பிட்ட காலம் வரை எந்தத் தலைப்பும் இன்றி அன்டைட்டில்ட் என்றே அழைக்கப்பட்டு வந்தது.
அமெரிக்காவிற்கு வெளியே கனடா உள்ளிட்ட நாடுகளின் கூட்டுத் தயாரிப்பாகவும் இது உருவானது ஒரு குறிப்பிடத்தக்க நிகழ்வாகும்.
படத்தின் கதை:-
1968 ஆம் ஆண்டு சிகாகோவில் வில்லியம் ஓ நீல் (லகீத் ஸ்டான்ஃபீல்ட்) எனும் 19 வயது இளம் குற்றவாளி ஒரு வாகனத்தைத் திருட முயலும்போது போலீசாரிடம் சிக்கிக்கொள்கிறான்.
அவன் தன்னை ஒரு ஃபெடரல் அதிகாரி என்று போலி அடையாள அட்டை காட்டி ஏமாற்ற முயன்றதால் அவனுக்கு நீண்ட கால சிறைத்தண்டனை கிடைக்க வாய்ப்பு உருவாகிறது.
இந்தச் சூழலில் எப் பி ஐ சிறப்பு முகவர் ராய் மிட்செல் (ஜெஸ்ஸி பிளெமன்ஸ்) அவனிடம் ஒரு ஒப்பந்தம் செய்கிறார்.
சிறைத் தண்டனையிலிருந்து தப்பிக்க வேண்டுமென்றால் பிளாக் பான்தர் பார்ட்டி எனும் அமைப்பிற்குள் ஊடுருவி அதன் தலைவரான ஃப்ரெட் ஹாம்டன் (டேனியல் கலுயா) பற்றிய தகவல்களை வழங்க வேண்டும் என்பதே அந்த நிபந்தனை.
இதற்கு ஓ நீல் சம்மதிக்கிறான்.
ஓ நீல் மிகச் சரியாகத் திட்டமிட்டு பிளாக் பான்தர் அமைப்பில் இணைகிறான். ஃப்ரெட் ஹாம்டனின் நம்பிக்கைக்குரியவனாக மாற மெல்ல மெல்ல முயல்கிறான்.
ஃப்ரெட் ஹாம்டன் ஒரு மிகச்சிறந்த பேச்சாளர். அவர் சிகாகோவில் உள்ள பல்வேறு இனக்குழுக்கள் மற்றும் எதிரெதிர் கும்பல்களை ஒன்றிணைத்து ரெயின்போ என்ற கூட்டணியை உருவாக்குகிறார்.
ஏழை குழந்தைகளுக்கு இலவச காலை உணவு வழங்கும் திட்டம் மற்றும் மருத்துவ உதவிகள் மூலம் மக்களிடம் ஹாம்டன் செல்வாக்கு பெறுகிறார்.
இதற்கிடையில் ஹாம்டன் டெபோரா ஜான்சன் (டொமினிக் பிஷ் பேக்) எனும் சக உறுப்பினர் மீது காதல் கொள்கிறார்.
ஓ நீல் தனக்கு கிடைக்கும் ரகசிய தகவல்களை மிட்செலிடம் வழங்கி அதற்குப் பிரதிபலனாகப் பணத்தைப் பெற்றுக்கொள்கிறான்.
71 டாலர் மதிப்புள்ள ஐஸ்கிரீம் பார்களைத் திருடியதாகக் குற்றம் சாட்டப்பட்டு ஹாம்டன் சிறையில் அடைக்கப்படுகிறார்.
அவர் இல்லாத நேரத்தில் ஓ நீல் தனது விசுவாசத்தைக் காட்டி அந்த அமைப்பின் பாதுகாப்புப் பிரிவு கேப்டனாகப் பதவி உயர்வு பெறுகிறான்.
ஒரு கட்டத்தில் போலீசாருக்கும் பிளாக் பான்தர் உறுப்பினர்களுக்கும் இடையே துப்பாக்கிச் சண்டை ஏற்படுகிறது.
அப்போது போலீசார் அந்த அலுவலகத்தின் மீது தீக்குண்டுகளை வீசுகின்றனர். இதில் தான் கொல்லப்பட்டிருப்பேனே பாவிகளா என்று அஞ்சும் ஓ நீல் இந்த வேலையிலிருந்து விலக நினைக்கிறான்.
ஆனால் மிட்செல் அவனை மிரட்டி தொடர்ந்து பணியாற்ற வைக்கிறார்.
மூன்று மாதங்களுக்குப் பிறகு ஜாமீனில் வெளிவரும் ஹாம்டன் கர்ப்பமாக இருக்கும் டெபோராவைச் சந்திக்கிறார்.
இதற்கிடையில் போலீசாரால் சுடப்பட்டு மருத்துவமனையில் அனுமதிக்கப்பட்ட ஜிம்மி பால்மர் (ஆஷ்டன் சாண்டர்ஸ்) மர்மமான முறையில் இறக்கிறார்.
இதனால் ஆத்திரமடைந்த ஜேக் வின்டர்ஸ் (அல்ஜி ஸ்மித்) போலீசாருடன் சண்டையிட்டு பல அதிகாரிகளைக் கொன்று தானும் உயிரிழக்கிறான்.
ஹாம்டனின் மேல்முறையீடு நிராகரிக்கப்பட்டதால் அவர் மீண்டும் சிறை செல்ல வேண்டிய நிலை ஏற்படுகிறது.
ஆனால் எப் பி ஐ இயக்குனர் ஜே எட்கர் ஹூவர் (மார்ட்டின் ஷீன்) ஹாம்டனை சிறைக்கு அனுப்பாமல் அவரை முற்றிலுமாக ஒழிக்க உத்தரவிடுகிறார்.
ஹாம்டன் இருக்கும் இடத்தை அறிந்துகொள்ள ஓ நீலை மிட்செல் வற்புறுத்துகிறார். ஓ நீலுக்கு ஒரு மயக்க மருந்து பாட்டில் வழங்கப்படுகிறது.
ஹாம்டனின் பானத்தில் அதை கலந்துவிடுமாறு அவன் பணிக்கப்படுகிறான்.
ஒரு மாலைப் பொழுதில் பிளாக் பான்தர் உறுப்பினர்கள் ஹாம்டனின் வீட்டில் கூடியிருக்கிறார்கள்.
அங்கிருந்து அவர் சிறைக்குச் செல்ல வேண்டியிருந்தது.
அப்போது ஓ நீல் தயக்கத்துடனேயே ஹாம்டனின் பானத்தில் மயக்க மருந்தைக் கலந்து கொடுக்கிறான்.
ஹாம்டன் மயங்கிய பிறகு ஓ நீல் அங்கிருந்து தப்பி வெளியேறுகிறான். நள்ளிரவில் போலீசார் ஹாம்டனின் வீட்டைச் சூழ்ந்து சரமாரியாகத் துப்பாக்கிச் சூடு நடத்துகின்றனர்.
ஆழ்ந்த மயக்கத்திலேயே ஹாம்டன் சுட்டுக் கொல்லப்படுகிறார். அங்கிருந்த மற்ற உறுப்பினர்களும் தாக்கப்படுகிறார்கள்.
டெபோரா கைது செய்யப்படுகிறார்.
முடிவும் வரலாற்று உண்மைகளும்
தனது பணி முடிந்ததும் ஓ நீல் மிட்செலைச் சந்திக்கிறான்.
மிட்செல் அவனுக்கு ஒரு பெட்ரோல் நிலையத்தின் சாவியையும் பணத்தையும் கொடுக்கிறார். விருப்பமில்லாமல் அவற்றைப் பெற்றுக்கொள்ளும் ஓ நீல் தனது துரோக உணர்வுடன் அங்கிருந்து நகர்கிறான்.
திரைப்படத்தின் இறுதியில் நிஜமான ஃப்ரெட் ஹாம்டனின் இறுதிச் சடங்கு காட்சிகள் மற்றும் 1989 இல் வில்லியம் ஓ நீல் அளித்த பேட்டி ஆகியவை காட்டப்படுகின்றன.
ஓ நீல் பல ஆண்டுகள் எப் பி ஐ உளவாளியாகவே தொடர்ந்தார் என்பதும் பின்னர் 1990 இல் அவர் தற்கொலை செய்துகொண்டார் என்பதும் திரையில் விவரிக்கப்படுகிறது.
ஃப்ரெட் ஹாம்டனின் படுகொலைக்காகத் தொடரப்பட்ட வழக்கில் எப் பி ஐ 1.85 மில்லியன் டாலர் நஷ்டஈடு வழங்கியது.
இன்று ஃப்ரெட் ஹாம்டனின் மகனும் மனைவியும் பிளாக் பான்தர் அமைப்பின் வழித்தோன்றல்களாக அதன் லட்சியங்களைத் தொடர்ந்து முன்னெடுத்து வருகின்றனர் என்பதை நாம் அறிகையில் படம் நிறைகிறது.
இந்தத் திரைப்படம் அதிகார வர்க்கத்தின் அடக்குமுறை மற்றும் தனிமனித துரோகம் ஆகியவற்றுக்கு இடையே நடக்கும் ஒரு அறப்போராட்டத்தைப் பதிவு செய்கிறது.
ஒரு புறம் ஒடுக்கப்பட்ட மக்களின் உரிமைக்காகவும் பசிப்பிணி போக்கவும் பல்வேறு இனக்குழுக்களை ஒன்றிணைத்து ஒரு பெரும் புரட்சியை முன்னெடுக்கும் ஃப்ரெட் ஹாம்டனின் ஆளுமையையும் மறுபுறம் தனது சொந்த விடுதலைக்காகத் தார்மீக விழுமியங்களைக் காற்றில் பறக்கவிட்டு காட்டிக்கொடுக்கும் வில்லியம் ஓ நீலின் மனப்போராட்டத்தையும் இது சமமாகச் சித்தரிக்கிறது.
அரசு இயந்திரம் தனக்கு அச்சுறுத்தலாகக் கருதும் ஒரு மக்கள் தலைவனை ஜனநாயக ரீதியாக எதிர்கொள்ளாமல் சதி மற்றும் வன்முறை மூலம் எப்படி நசுக்குகிறது என்பதை இந்தப் படம் வெளிச்சம் போட்டுக் காட்டுகிறது.
குறிப்பாக ஒரு புரட்சியாளனை அவனது எதிரிகளை விடவும் அவனுக்கு மிக நெருக்கமான ஒருவனைக் கொண்டே வீழ்த்துவது என்பது வரலாற்றில் தொடரும் ஒரு கசப்பான உண்மை என்பதை இப்படம் ஆணித்தரமாகச் சொல்கிறது.
பயம் என்பது ஒரு மனிதனை எந்த எல்லைக்கும் கொண்டு செல்லும் என்பதையும் அதிகாரத்தின் பிடியில் சிக்கிய ஒரு உளவாளி அடையும் மன உளைச்சலையும் இப்படம் காட்சிப்படுத்துகிறது.
தனிநபர்களைக் கொல்வதன் மூலம் ஒரு கருத்தியலை அழித்துவிட முடியாது என்பதும் அநீதிக்கு எதிராகக் குரல் கொடுக்கும் தலைவர்கள் கொல்லப்பட்டாலும் அவர்களின் லட்சியம் அடுத்த தலைமுறைக்கும் கடத்தப்படும் என்பதே இந்தப் படம் வழங்கும் மையமான செய்தியாகும்.
ஹாம்டனின் தியாகமும் ஓ நீலின் தீராத குற்ற உணர்ச்சியும் அதிகார வர்க்கத்தின் வஞ்சகமும் ஒன்றிணைந்து ஒரு வரலாற்றுப் பாடமாக இந்தப் படத்தில் பதிவாகியுள்ளது.
