எட்வர்ட் பெர்கர் இயக்கத்தில் பீட்டர் ஸ்டிராகன் திரைக்கதையில் உருவான கான்க்ளேவ் திரைப்படம் 2024 ஆம் ஆண்டின் மிகச்சிறந்த அரசியல் திரில்லர் படைப்பு.
ராபர்ட் ஹாரிஸ் எழுதிய புதினத்தைத் தழுவி எடுக்கப்பட்ட இத்திரைப்படம் கத்தோலிக்க திருச்சபையின் போப் ஆண்டவர் மறைவிற்குப் பிறகு புதிய தலைவரைத் தேர்ந்தெடுக்கும் புனிதமான மற்றும் அரசியல் சூழ்ச்சிகள் நிறைந்த நடைமுறையை மையமாகக் கொண்டு நகர்கிறது,இது அதிகாரத்தின் பின்னால் இருக்கும் மனித பலவீனங்களையும் ரகசியங்களையும் மிக நுணுக்கமாகத் தோலுரித்துக் காட்டுகிறது.
கான்க்ளேவ் திரைப்படத்தின் அடிநாதம் அதிகாரத்தின் உச்சத்தில் இருக்கும் மனிதர்களுக்கு இடையே நிகழும் தார்மீகப் போராட்டமும் நம்பிக்கையின் அடிப்படையில் எழும் சந்தேகங்களுமே ஆகும்.
இத்திரைப்படம் ஒரு தலைமைத்துவப் பதவிக்கான போட்டி என்பதைத் தாண்டி மதம் மற்றும் ஆன்மீகம் ஒரு மனிதனை எவ்வாறு வழிநடத்த வேண்டும் என்பது குறித்த ஆழமான செய்தியை முன்வைக்கிறது.
உறுதியான விடைகளை விடவும் தேடலும் சந்தேகமுமே ஒரு மனிதனைப் புனிதத்தை நோக்கி நகர்த்தும் என்பதைத் தொடக்கத்திலேயே முதன்மை கதாபாத்திரம் மூலம் இப்படம் பதிவு செய்கிறது.
வாட்டிகன் திருச்சபையின் எதிர்காலத்தைத் தீர்மானிக்கும் தருணத்தில் பழமைவாதத்திற்கும் நவீன கால மாற்றத்திற்கும் இடையிலான மோதல் படத்தின் சாராம்சமாகத் திகழ்கிறது.
அதிகாரத்தை அடைவதற்காக மனிதர்கள் மேற்கொள்ளும் சூழ்ச்சிகள் மற்றும் ரகசியங்கள் எவ்வளவு புனிதமான இடத்திலும் ஊடுருவி இருக்கும் என்பதைத் திரைக்கதை நுணுக்கமாக உணர்த்துகிறது.
வெளிப்படையான அரசியல் போராட்டங்களுக்கு அப்பாற்பட்டு ஒவ்வொரு கார்டினலுக்குள்ளும் இருக்கும் பலவீனங்களும் அவர்கள் சுமக்கும் கடந்த காலப் பாவங்களும் ஒரு தனி மனிதன் தலைமைப் பொறுப்பிற்குத் தகுதியானவனா என்ற கேள்வியை எழுப்புகின்றன.
இப்படத்தின் இறுதிச் செய்தி மதம் என்பது வெறும் சட்டங்களோ அல்லது பாலினம் சார்ந்த அதிகார அமைப்போ அல்ல என்பதை வலியுறுத்துகிறது.
அனைத்துப் புனிதச் சுவர்களையும் கடந்து கடவுளின் படைப்பு என்பது எத்தகையது என்ற ஒரு மிகப்பெரிய புரிதலை கிளைமாக்ஸ் காட்சி நமக்கு வழங்குகிறது.
ஒரு மதத்தலைவர் என்பவர் அதிகாரத்தால் ஆளப்படுபவர் அல்ல மாறாகத் தன்னலமற்ற சேவையும் எல்லோரையும் உள்ளடக்கிய அன்பும் கொண்டவர் என்பதே இத்திரைப்படம் உலகிற்குச் சொல்லும் மிக முக்கியமான பாடமாகும்.
ஒருபுறம் ஆன்மீக மரபுகளைப் போற்றும் அதே வேளையில் மறுபுறம் நவீன உலகின் முற்போக்கு மற்றும் பிற்போக்குச் சிந்தனைகளுக்கு இடையிலான மோதலை ஒரு சதுரங்க ஆட்டம் போல் விறுவிறுப்பாகக் காட்சிப்படுத்திய விதம் உலகத் தரத்திலான ஒரு திரை அனுபவத்தை வழங்குகிறது.
இயக்குநர் எட்வர்ட் பெர்கர் இப்படத்தின் ஓட்டத்தை மிகவும் நிதானமாகவும் அதே சமயம் அழுத்தமாகவும் கையாண்டுள்ளார். வாடிகன் நகரின் மூடிய கதவுகளுக்குப் பின்னால் நடக்கும் அதிகாரப் போட்டியை ஒரு சிறைச்சாலையின் சூழலுக்கு நிகரான பதற்றத்துடன் அவர் உருவாக்கியுள்ளார்.
ஒளிப்பதிவாளர் ஸ்டெபான் ஃபோன்டைன் தனது கேமரா கோணங்கள் மூலம் கார்டினல்களின் சிவப்பு நிற ஆடைகளுக்கும் வாடிகனின் பிரம்மாண்டமான கட்டிடக்கலைக்கும் இடையே ஒரு மெய்சிலிர்க்க வைக்கும் காட்சிக் கோர்வையை ஏற்படுத்தியுள்ளார்.
குறிப்பாக சிஸ்டைன் சேப்பல் போன்ற இடங்களை மறு உருவாக்கம் செய்த விதம் படமாக்கத்தின் தரத்தையே உயர்த்தியுள்ளது. நவீன காலத்துத் தேவையற்ற வெளிச்சங்களைத் தவிர்த்து நிழல்களும் ஒளியும் கலந்த ஒரு ரகசியத் தன்மையை ஒளிப்பதிவு படம் முழுவதும் தக்கவைத்துள்ளது.
இத்திரைப்படம் 2024 ஆகஸ்ட் மாதம் டெல்லுரைடு திரைப்பட விழாவில் முதன்முதலாகத் திரையிடப்பட்டது. பின்னர் அக்டோபர் மற்றும் நவம்பர் மாதங்களில் அமெரிக்கா மற்றும் ஐக்கிய இராஜ்ஜியத்தில் திரையரங்குகளில் வெளியாகி பெரும் வரவேற்பைப் பெற்றது.
20 மில்லியன் டாலர் செலவில் எடுக்கப்பட்ட இப்படம் உலகளவில் 128 மில்லியன் டாலர் வசூலித்து மிகப்பெரிய வணிக வெற்றியும் பெற்றது.
2025 ஆம் ஆண்டு போப் பிரான்சிஸ் அவர்களின் மறைவுக்குப் பிறகு நிஜ உலகிலும் ஒரு புதிய போப் தேர்ந்தெடுக்கப்பட்ட சூழலில் இப்படத்திற்கான தேடல் இணையதளங்களில் பல மடங்கு அதிகரித்தது குறிப்பிடத்தக்கது.
நடிகர்களின் பங்களிப்பு இப்படத்தின் மிகப்பெரிய பலமாகும். கர்தினால் தாமஸ் லாரன்ஸாக நடித்த ரால்ப் ஃபியென்ஸ் தனது நடிப்பின் மூலம் குழப்பம் மற்றும் பொறுப்புணர்வைக் கச்சிதமாக வெளிப்படுத்தியுள்ளார்.
ஸ்டான்லி துச்சி, ஜான் லித்கோ மற்றும் இசபெல்லா ரோஸலினி ஆகியோர் தங்களுக்குக் கொடுக்கப்பட்ட கதாபாத்திரங்களில் மிகச் சிறந்த நடிப்பை வழங்கியுள்ளனர்.
இசபெல்லா ரோஸலினி அமைதியான ஆளுமைமிக்க கன்னியாஸ்திரியாகக் கவர்ந்துள்ளார்.
வோல்கர் பெர்டெல்மேனின் இசை இப்படத்தின் ஆன்மாவாகச் செயல்படுகிறது. வழக்கமான தேவாலய இசைக்கருவிகளைத் தவிர்த்து கிரிஸ்டல் பாஷெட் போன்ற மாறுபட்ட கருவிகளைப் பயன்படுத்தி அவர் உருவாக்கிய பின்னணி இசை ஒவ்வொரு காட்சியிலும் ஒருவிதமான மர்மத்தையும் தேடலையும் உணர்த்துகிறது.
கான்க்ளேவ் திரைப்படம் 2024 ஆம் ஆண்டின் சிறந்த படங்களில் ஒன்றாகத் தேர்ந்தெடுக்கப்பட்டது. பிரிட்டிஷ் அகாடமி திரைப்பட விருதுகளில் சிறந்த படம் உட்பட நான்கு விருதுகளை வென்றது.
கோல்டன் குளோப் விருதுகளில் சிறந்த திரைக்கதைக்கான விருதையும் ஸ்கிரீன் ஆக்டர்ஸ் கில்ட் விருதையும் இப்படம் வென்றது.
97 வது ஆஸ்கார் விருதுகளில் சிறந்த படம் உட்பட எட்டு பரிந்துரைகளைப் பெற்று இறுதியில் சிறந்த தழுவல் திரைக்கதைக்கான ஆஸ்கார் விருதை வென்று உலக சினிமா வரலாற்றில் தனது முத்திரையைப் பதித்தது.
படமாக்கத்தின் போது கார்டினல்களின் வாக்கெடுப்பு முறையை மிகத் துல்லியமாகக் காட்ட வேண்டும் என்பதற்காக திரைக்கதை ஆசிரியர் வாட்டிகன் அதிகாரிகளிடம் நேரடி ஆலோசனைகளைப் பெற்று ஒவ்வொரு சிறு அசைவையும் வடிவமைத்தார்.
திரைக்கதை ஆசிரியர் பீட்டர் ஸ்டிராகன் படத்தின் நம்பகத்தன்மைக்காக ஒரு நிஜமான கார்டினலை நேரில் சந்தித்து ஆலோசனைகளைப் பெற்றார். மேலும் வாட்டிகன் நிர்வாகம் அவருக்குத் தனது வளாகத்திற்குள் ஒரு தனிப்பட்ட பயணத்தை மேற்கொண்டு ஆய்வு செய்ய அனுமதி அளித்தது குறிப்பிடத்தக்கது.
ஸ்டான்லி துச்சி ஏற்று நடித்த பெலினி கதாபாத்திரம் 2005 ஆம் ஆண்டு நடந்த நிஜமான போப் தேர்தலின் போது கார்டினல் கார்லோ மரியா மார்டினி எதிர்கொண்ட அனுபவங்களின் அடிப்படையில் வடிவமைக்கப்பட்டது
ஒளிப்பதிவில் பயன்படுத்தப்பட்ட வண்ணக் கலவையானது மறுமலர்ச்சிக் கால ஓவியங்களின் சாயலைத் தரும் வகையில் திட்டமிடப்பட்டது. இதற்காக கேமரா லென்ஸ்கள் மற்றும் ஒளியமைப்பு முறையில் பல புதிய சோதனைகள் மேற்கொள்ளப்பட்டன.
திரைப்படத்தின் பின்னணி இசையில் ஒலிகளுக்கு இடையே கொடுக்கப்பட்ட இடைவெளிகள் கார்டினல்களின் மனப்போராட்டத்தை மௌனமாக விவரிக்கப் பயன்படுத்தப்பட்டன.
ஸ்டுடியோவில் அமைக்கப்பட்ட அரங்குகள் நிஜமான வாட்டிகன் கட்டிடங்களின் அளவீடுகளை விடவும் சற்று சிறியதாக உருவாக்கப்பட்டன. இது கதாபாத்திரங்களுக்கு இடையே ஒருவிதமான நெருக்கடியையும் மூச்சுத்திணறலையும் பார்வையாளர்களுக்குக் கடத்த உதவியது.
இத்திரைப்படம் வெளியான போது சமூக வலைதளங்களில் இளைய தலைமுறையினர் இப்படத்தின் காட்சிகளைப் பல்வேறு மீம்ஸ்களாக உருவாக்கிப் பகிர்ந்து உலகளாவிய கவனத்தைப் பெறச் செய்தனர்.
இப்படத்தின் இறுதிக்கட்டத் திருப்பம் மத ரீதியான விவாதங்களைத் தாண்டி மனித உடல் மற்றும் ஆன்மீகம் குறித்த ஆழமான கேள்விகளை முன்வைத்தது.
பல உலக நாடுகளின் திரைப்பட விழாக்களில் இத்திரைப்படம் திரையிடப்பட்ட போது கத்தோலிக்க மதகுருமார்கள் பலரும் நேரில் வந்து பார்த்துத் தங்களின் கருத்துகளைப் பரிமாறிக் கொண்டது இப்படத்தின் வெற்றிக்குச் சான்றாக அமைந்தது.
படத்தின் கதை:-
வாட்டிகன் நகரின் போப்பாண்டவர் திடீர் மாரடைப்பால் காலமானதைத் தொடர்ந்து, அடுத்த தலைவரைத் தேர்ந்தெடுக்கும் கான்க்ளேவ் எனும் ரகசியக் கூட்டம் தொடங்குகிறது, இந்தத் தேர்தலை நடத்தும் முக்கியப் பொறுப்பு கார்டினல் தாமஸ் லாரன்ஸ் (ரால்ப் ஃபைன்ஸ்) வசம் ஒப்படைக்கப்படுகிறது, வாட்டிகன் சட்டப்படி கார்டினல்கள் அனைவரும் வெளியுலகத் தொடர்பு இல்லாமல் ரகசியமாகத் தங்கி புதிய போப்பாண்டவரைத் தேர்ந்தெடுக்க வேண்டும்,
இந்தப் போட்டியில் முற்போக்குவாதியான கார்டினல் ஆல்டோ பெலினி (ஸ்டான்லி துச்சி), பழமைவாதியான கார்டினல் ஜோஷுவா அடயேமி (லூசியன் மசாமிட்டி), மிதவாதியான கார்டினல் ஜோசப் ட்ரெம்ப்ளே (ஜான் லித்கோ) மற்றும் தீவிர கொள்கைவாதியான கார்டினல் கோஃப்ரெடோ டெடெஸ்கோ (செர்ஜியோ காஸ்டெலிட்டோ) என நான்கு பேர் முக்கிய வேட்பாளர்களாகத் தெரிகிறார்கள்.
இந்தச் சூழலில், மறைந்த போப்பாண்டவர் இறப்பதற்கு முன் கார்டினல் ட்ரெம்ப்ளேவை பதவியிலிருந்து நீக்க உத்தரவிட்டதாக ஒரு தகவல் கசிகிறது,
இதற்கிடையில் யாரிடமும் சொல்லாமல் ரகசியமாக நியமிக்கப்பட்ட கார்டினல் வின்சென்ட் பெனிடெஸ் (கார்லோஸ் டைஹ்ஸ்) என்பவர் காபூலில் இருந்து வாடிகன் வந்து சேர்ந்து அனைவருக்கும் அதிர்ச்சியளிக்கிறார்,
வாக்கெடுப்பு தொடங்கும்போது எந்த கார்டினலுக்கும் தெளிவான பெரும்பான்மை கிடைக்காமல் இழுபறி நீடிக்கிறது,
லாரன்ஸின் உதவியாளர் ஓ'மாலி (பிரியன் எஃப். ஓ'பைர்ன்), கார்டினல் பெனிடெஸ் ஜெனீவாவில் ஒரு மருத்துவச் சிகிச்சையை ரத்து செய்ததை மர்மமாகக் கண்டுபிடிக்கிறார்,
இரண்டாம் நாளில் கார்டினல் அடயேமிக்கும் சகோதரி ஷனுமி (பல்கிசா மைகா) என்ற கன்னியாஸ்திரிக்கும் பழைய தொடர்பு இருந்ததும், அவர்களுக்கு ஒரு மகன் இருப்பதும் அம்பலமாகி அவரது வாய்ப்பு பறிபோகிறது.
லாரன்ஸ் மற்றும் சமையல் பொறுப்பாளரான சகோதரி ஆக்னஸ் (இசபெல்லா ரோசெலினி) இணைந்து தேடியதில், கார்டினல் ட்ரெம்ப்ளே மற்ற கார்டினல்களுக்குப் பணம் கொடுத்து வாக்குகளை விலைக்கு வாங்கியதற்கான ஆதாரங்கள் போப்பின் ரகசிய அறையில் சிக்குகின்றன,
இதனால் ட்ரெம்ப்ளே போட்டியிலிருந்து வெளியேற்றப்படுகிறார்,
மூன்றாம் நாளில் வாடிகன் நகரை அதிர வைக்கும் வகையில் வெளியுலகில் பயங்கரவாதக் குண்டுவெடிப்புகள் நிகழ்கின்றன,
சிஸ்டைன் சேப்பல் எனப்படும் புனிதக் கட்டிடத்தின் ஜன்னல்கள் சிதறும் அளவுக்கு அதிர்வு ஏற்படுகிறது,
இந்த இக்கட்டான நேரத்தில் மற்ற மதங்களுக்கு எதிராகப் போர் முழக்கம் செய்த கார்டினல் டெடெஸ்கோவை தடுத்து நிறுத்தும் பெனிடெஸ், வன்முறைக்கு வன்முறை தீர்வாகாது என்றும் மதத்தின் உண்மையான நோக்கம் அமைதி மட்டுமே என்றும் ஆவேசமாகப் பேசுகிறார்.
அவரது நேர்மையான பேச்சால் கவரப்பட்ட அனைத்து கார்டினல்களும் பெனிடெஸை புதிய போப்பாண்டவராகத் தேர்ந்தெடுக்கிறார்கள்,
அவர் இன்னசண்ட் XIV என்ற பெயரில் அரியணை ஏறுகிறார், தேர்தல் முடிந்ததும் பெனிடெஸ் ஏன் அந்த மருத்துவச் சிகிச்சையை ரத்து செய்தார் என்ற மர்மத்தை லாரன்ஸ் கண்டுபிடிக்கிறார்,
கார்டினல் பெனிடெஸ் பிறப்பாலேயே ஆண் மற்றும் பெண் ஆகிய இரு பாலின உறுப்புகளும் கொண்ட ஒரு 'திருநங்கை' என்பது தெரியவருகிறது,
தன்னுடைய உடலில் இருக்கும் கருப்பை மற்றும் சினைப்பையை அகற்ற அறுவை சிகிச்சை செய்யச் சென்ற அவர், கடவுள் தன்னை இப்படித்தான் படைத்தார் என்றால் அதை ஏன் மாற்ற வேண்டும் என்று கருதி சிகிச்சையைத் தவிர்த்ததை லாரன்ஸிடம் ஒப்புக்கொள்கிறார்,
ஒரு பெண்ணுக்குரிய உடலமைப்பு கொண்ட ஒருவர் கத்தோலிக்க மதத்தின் மிக உயரிய போப்பாண்டவர் பதவியில் அமர்ந்திருக்கும் அந்தப் பெரும் ரகசியத்தை லாரன்ஸ் வியப்புடன் நோக்குகிறார்,
வாடிகன் வரலாற்றிலேயே இது ஒரு புரட்சிகரமான மாற்றமாக அமைவதைத் தன் ஜன்னல் வழியாகப் பார்த்தபடி லாரன்ஸ் அமைதியாகையில் படம் நிறைகிறது.
வத்திக்கான் திருச்சபையின் ஆயிரக்கணக்கான கால வரலாற்றில் கற்பனைக்கும் எட்டாத ஒரு புரட்சிகரமான கருத்தாக்கத்தை இப்படம் நுணுக்கமான திரைக்கதை மூலம் கையாண்டுள்ளது.
ஒரு திருநம்பி போப்பாண்டவராகத் தேர்ந்தெடுக்கப்படுவதை பரபரப்புக்காகப் பயன்படுத்தாமல் ஆன்மீகத்தோடும் இறையியலோடும் இணைத்து புனைந்த விதம் பாராட்டுக்குரியது.
கார்டினல் வின்சென்ட் பெனிடெஸ் தொடக்கத்திலிருந்தே அமைதியான மற்றும் ஆழமான ஆன்மீகத் தேடல் கொண்டவராகவும் அதிகாரத்தின் மீது ஆசை இல்லாதவராகவும் காட்டப்படுகிறார்.
இந்த அடிப்படை பிம்பமே இறுதிக்காட்சியில் அவர் பற்றிய ரகசியம் வெளிப்படும்போது அவர் மீதான மரியாதையைக் குறையாமல் பாதுகாக்கிறது.
தன் உடலைப் பற்றிய உண்மையை அறிந்த பின்பும் அதை மாற்றிக்கொள்ள மறுப்பதில் படத்தின் மிக முக்கியமான முற்போக்குச் செய்தி உள்ளது.
கடவுள் என்னை எப்படிப் படைத்தாரோ அப்படியே இருக்க விரும்புகிறேன் என்று அவர் கூறும் இடம் கடவுளின் படைப்பில் குறையேதுமில்லை என்ற கத்தோலிக்க நம்பிக்கையோடு நேர்த்தியாகப் பொருத்தப்பட்டுள்ளது.
மற்ற வேட்பாளர்கள் தங்களின் ரகசியங்கள் மற்றும் பேராசை காரணமாக வெளியேற்றப்பட இறுதியில் எஞ்சியிருக்கும் ஒரே தூய்மையான ஆளுமையாக பெனிடெஸ் முன்நிறுத்தப்படுகிறார்.
ஒரு வெடிகுண்டுத் தாக்குதலுக்குப் பிறகு அவர் நிகழ்த்தும் ஆவேசமான உரை அவரைப் பாலின அடையாளத்திற்கு அப்பாற்பட்ட தலைவராக ஏற்க வைக்கிறது.
இறுதியில் அவர் இன்னசண்ட் XIV என்ற பெயரில் அரியணை ஏறுவது ஒரு புதிய தொடக்கத்தின் அடையாளமாகும். ஒரு பெண்ணுக்குரிய கருப்பையைச் சுமந்துகொண்டு ஒரு ஆணுக்குரிய அதிகாரப் பீடத்தில் அவர் அமர்ந்திருப்பது பாலினப் பாகுபாடுகளைக் கடந்த ஒரு தெய்வீகத் தன்மையைப் படம்பிடித்துக் காட்டுகிறது.
இவ்வாறாக இப்படம் ஒரு துணிச்சலான சமூகச் செய்தியை புனிதமான வாடிகன் சூழலுக்குள் மிகுந்த கண்ணியத்துடனும் நேர்த்தியான புனைவுடனும் பதிவு செய்துள்ளது.
